Први вакви случаи во Словенија од 2024 година: Вирусот на Западен Нил потврден кај две сиви врани

Словенечкиот национален ветеринарен институт го потврди присуството на вирусот на Западен Нил кај две угинати сиви врани пронајдени во областите на Љубљана и Гросупље во централна Словенија, објави денеска новинската агенција СТА.

Ова се првите вакви случаи во Словенија од 2024 година.

Досега оваа година не се регистрирани случаи на вирусот кај луѓето, соопшти денеска Управата за безбедност на храна, ветеринарство и заштита на растенијата.

Птиците служат како резервоари за вирусот на Западен Нил, додека комарците дејствуваат како преносители (вектори). Неколку видови птици – особено враните – се високо подложни на инфекција, што може да доведе до брзо ширење на болеста и масовно угинување.

Коњите исто така можат да бидат подложни на инфекција, се наведува во соопштението на Управата.

Вирусот на Западен Нил е широко распространет низ Европа, Азија, Африка, Австралија и Америка. Според податоците на Европскиот центар за превенција и контрола на болести, оваа година низ Европа се регистрирани повеќе од 1.000 случаи на локално пренесување, при што бројот на случаи нагло расте во последните недели.

Оваа година, болеста е потврдена во Хрватска, Северна Македонија, Холандија, Италија, Шпанија, Белгија, Германија, Австрија, Грција, Швајцарија и Франција, објави агенцијата. Според податоците на Националниот институт за јавно здравје на Словенија, повеќето заразени лица немаат симптоми или имаат симптоми слични на грип, како што се треска, главоболка, болки во мускулите и замор.

Во некои случаи, болеста може да има тежок тек, вклучително и оштетување на централниот нервен систем. Повеќето инфекции се јавуваат помеѓу средината на јули и крајот на септември, наведе словенечката агенција, а пренесе „Танјуг“.