Пропадна обидот да се ограничат овластувањата на Трамп за војната во Иран

Републиканците во Претставничкиот дом на САД го блокираа обидот на демократите да ги ограничат овластувањата на американскиот претседател Доналд Трамп да води војна против Иран.

Претставникот на демократите Глен Ајви се обиде да протурка резолуција за воени овластувања на „про форма“ седница користејќи ја постапката за „едногласна согласност“, која овозможува заобиколување на формално гласање ако никој не се спротивставува, но беше блокиран од претставникот на републиканците Крис Смит, кој претседаваше со седницата.

Смит ја заврши кратката седница без да му дозволи на Ајви да зборува, а демократите гласно протестираа, со скандирања „Срамно“, објави NBC News.

Надвор од Капитолот, демократите го критикуваа Трамп за заканата дека ќе ја нападне цивилната инфраструктура и ќе го врати Иран во „каменото доба“ ако неговите лидери не се согласат повторно да го отворат Ормускиот теснец, клучен бродски пат што ги поврзува Персискиот Залив и Оманскиот Залив.

Демократите, исто така, го повикаа претседателот на Претставничкиот дом Мајк Џонсон да ја прекине двонеделната пролетна пауза и да свика седница за гласање за резолуцијата за воени овластувања, но тој ги игнорираше нивните молби.

Обидот на демократите во Претставничкиот дом е само подготовка за посериозна акција следната недела, кога конгресмените ќе се вратат во Вашингтон.

Демократите во Сенатот потоа планираат да изнудат гласање за нивната резолуција за воени овластувања. Доколку биде усвоена, резолуцијата би ги запрела сите воени дејствија на Трамп во Иран и би му дала на Конгресот овластување да одобри каква било идна воена акција, според американската телевизиска мрежа.

За да се усвои резолуцијата е потребно просто мнозинство. Сенатот, контролиран од републиканците, ги отфрли резолуциите за воени овластувања што би ги ограничиле дејствијата на Трамп во последните месеци, а сенаторот Ранд Пол од Кентаки е единствениот републиканец кој постојано гласа за нив.

Сепак, демократите сакаат да го зголемат притисокот врз републиканците и да ги придобијат оние што се загрижени за ескалирачката реторика на Трамп кон Иран.