Средбата меѓу Макрон и средношколците не вроди со плод: Нивните претставници повикаа на продолжување на протестите во Франција

Претставници на француските средношколци денеска повикаа на продолжување на протестите по средбата со францускиот претседател Емануел Макрон – која траеше околу три часа – наведувајќи дека, и покрај ветувањата за реформи, не добиле конкретни мерки какви што побарале.

„Не сме задоволни“, изјави Натанаел Комбари од организацијата „Renouveau lyceen“ за „Франс 24“ (France 24), повикувајќи ги учениците да продолжат со мобилизацијата.

Сепак, тој напомена дека Макрон, во текот на средбата, првично покажал подготвеност да ги сослуша нивните барања и дека биле дадени јасни ветувања – конкретно во врска со реформата на училишната демократија и темелна промена на платформата „Parcoursup“, која учениците ја користат за пријавување за упис на високообразовни институции.

Истовремено, Комбари изрази жалење поради отсуството на конкретни мерки, додека друг претставник на учениците спомена дека за време на дискусијата било покренато и прашањето за полициското насилство.

Комбари повтори дека учениците ќе продолжат со протестите на улиците и утре. Една од претставничките на средношколците нагласи дека нејзиниот глас – како и гласовите на другите средношколци – треба да се слушне како „глас на зрели средношколци“.

„Не сме револтирани поради помфритот што се служи во училишната менза или поради тоа што ни ги одзедоа телефоните. Ако протестираме, тоа е затоа што бараме работи – основни човечки потреби – кои тие одбиваат да ги исполнат“, изјави таа за „Франс 24“.

Претставниците на средношколските организации кои се сретнаа со Макрон повикаа протестите да продолжат сè додека не бидат објавени конкретни мерки; првите од нив се очекуваат во понеделник, за време на средбата со премиерот Себастиен Лекорну. Учесниците на средбата истакнаа дека францускиот претседател покажал подготвеност да ги слушне нивните ставови и наведоа дека тој ветил темелна реформа на платформата „Паркурсуп“ (Parcoursup) – што е дел од пошироките дискусии за системот за упис во високото образование, кои започнаа оваа недела.

Сепак, средношколците продолжуваат да бараат укинување на оваа платформа.

Околу 20 претставници на средношколски организации денеска се сретнаа со Макрон во Елисејската палата, на негова покана.

Макрон сакаше да ги слушне нивните барања и загрижености пред средбата со премиерот, закажана за понеделник.
Учениците бараат реформа на средното образование, подобри услови за учење и укинување на платформата „Паркурсуп“.