Иран го крева влогот: Хамнеи најавува нова фаза од контролата врз Ормускиот теснец

Врховниот лидер на Иран, Моџтаба Хамнеи, вчера изјави дека Иран ќе влезе во нова фаза во управувањето со стратешкиот Ормуски теснец, според неговата порака до граѓаните, која беше прочитана на иранската државна телевизија.

Во пораката по повод 40 дена од смртта на водачот на Исламската револуција, ајатолахот Али Хамнеи, тој нагласи дека Иран не сака војна, но дека нема да се откаже од своите права и дека ги смета сите фронтови на отпорот за еден единствен ентитет, објави Press TV.

Моџтаба Хамнеи ја истакна важноста на континуираното учество на јавноста во борбата против американската и израелската агресија и го пофали иранскиот народ за неговата упорност и единство за време на „третата наметната војна“.

– До овој момент, херојскиот народ на Иран беше одлучувачки победник во оваа арена – рече Моџтаба Хамнеи.

Тој повика на единство меѓу различните сектори на општеството за да се направи Иран посилна и пообединета земја, нагласувајќи дека јавното присуство и уличните демонстрации имаат директно влијание врз преговорите и стратешките цели на земјата.

Моџтаба Хамнеи нагласи дека преговорите со непријателот не смеат да ја намалат потребата за ангажирање на народот и дека е должност на секој граѓанин да придонесе во заедничките напори, дури и кога нема активни борби.

Тој, исто така, предупреди против „непријателската пропаганда“ и ги повика луѓето да бидат критични кон медиумите под нивно влијание.

Хамнеи го повика народот да продолжи со борбата за остварување на иранските права.