Принцот Хари во проблеми: Семејното патување во Британија од знак прашање

Војводата од Сасекс ги преиспитува плановите да ги донесе сопругата и децата во Велика Британија следниот месец откако неговото барање за полициска заштита беше одбиено. Принцот Хари, неговата сопруга Меган и нивните деца Арчи и Лилибет требаше да ја посетат Велика Британија заедно за прв пат по четири години.

Неговиот тим поднесе формално барање за полициска заштита за време на нивниот престој во земјата, но наводно им било кажано дека нема да им биде обезбедена заштита финансирана од даночните обврзници, објави Би-Би-Си.

Извори велат дека принцот Хари бил потресен од одлуката, донесена само неколку дена пред пристигнувањето на семејството, но сепак сакал да најде начин да ја реализира посетата.

Тимот на принцот Хари го чекаше исходот од безбедносната проценка од страна на Кралскиот и ВИП Извршен комитет (RVEC), телото кое одлучува за безбедносните аранжмани за високите членови на кралското семејство за Министерството за внатрешни работи.

Тимот на принцот Хари и Меган соопшти дека двојката веќе прифатила понуда да престојуваат во кралскиот имот како гости на кралот Чарлс за време на нивното патување, иако локацијата на избраната кралска резиденција не е објавена.

Сепак, извори од Бакингемската палата изјавија дека не добиле потврда дека нивната понуда е прифатена.

Се очекувало двојката да користи и приватно сместување за време на престојот во Велика Британија. Полициска заштита ќе биде достапна за време на нивниот престој на кралскиот имот, но надвор од тоа, принцот Хари ќе мора да се потпре на приватен тим за обезбедување кој ќе патува со него од Калифорнија.

Семејството требаше да остане во Велика Британија околу пет дена. Меган, војвотката од Сасекс, планираше да му се придружи на својот сопруг на голем број јавни настани во Лондон и Мидлендс.