До 450.000 луѓе се собраа на прашкото плато Летна на масовни протести против владата на Чешката Република и во одбрана на јавните медиумски сервиси. Организаторите тврдат дека ова е најголемиот јавен собир во историјата на независна Чешка Република.
Здружението „Милион моменти за демократија“ бара од владејачката коалиција да го разреши Томио Окамура од функцијата потпретседател на Долниот дом на чешкиот Парламент, како и да ѝ ја одземе на движењето СПД (SPD) контролата врз Министерството за одбрана.
Организаторите ја повикаа владата да започне дијалог, како и да ги повлече законските решенија со кои би се укинале претплатите што служат за финансирање на јавните медиумски сервиси.
„Чешкиот народ се крена против носењето клучни закони во тајност, набрзина и без никаква јавна дебата“, изјави Микулаш Минарж, претседател на здружението, на почетокот на протестот.
„Некои луѓе се овде по петти пат; тие стоеја токму на ова место уште во 1989 година“, рече Минарж, алудирајќи на протестите што му претходеа на падот на комунистичкиот режим.
Тој, исто така, ја критикуваше владата за начинот на кој зборува за младите луѓе и за демонстрантите, истакнувајќи дека нејзината реторика наликува на онаа што ја користеле комунистите пред револуцијата.
„Тие се во паника, прават грешки и се заплеткуваат во сопствените лаги“, рече Минарж, мислејќи на владејачката коалиција.
Според него, ерата на авторитарните политичари се ближи кон крајот. „Сè поконфузен и поуморен, Андреј Бабиш денес е само бледа сенка од она што беше порано“, изјави Минарж – констатација проследена со аплауз и скандирање од десетиците илјади луѓе собрани на платото Летна.
Повикувајќи се на полициски информации, Минарж истакна дека секој дел од просторот каде што се одржува протестот е исполнет.
„Тоа значи дека нè има повеќе отколку што нè имаше во март“, изјави тој. Организаторите упатија и остри критики кон политичкото раководство на земјата.
„Нашата земја е земена како заложник од неодговорни насилници и екстремисти“, изјавија организаторите, притоа повикувајќи ги демонстрантите да го одржат протестот мирен. Масовниот собир во Прага го одразува растечкото незадоволство кај дел од чешката јавност во однос на потезите на владејачката коалиција – особено во врска со законодавниот процес, односот кон демократските институции и иднината на јавните медиумски сервиси.
