Поради штракот на грчките цариници гужва на јужната граница

Патниците кои денеска патуваат кон Грција или се враќаат дома се соочуваат со километарски колони и повеќечасовни застои на јужната граница. Поради најавениот штрајк на грчките царински служби, кој се одржува во периодот од 05:00 до 09:00 часот по македонско време, сообраќајот на клучните гранични премини меѓу двете земји се одвива отежнато и под посебен, забавен режим.

Ограничувањата се однесуваат на сите три гранични премини меѓу Македонија и Грција – Евзони (Богородица), Ники (Меџитлија) и Дојрани (Дојран). За време на протестот, патничките возила се пропуштаат во интервали од по десет минути, што создава забавен проток и можни колони.

За разлика од патничките автомобили, товарниот сообраќај е целосно запрен. Камионите и останатите товарни возила не можат ниту да влезат, ниту да излезат од Грција додека трае штрајкот.

Грчките царински службеници со протестот бараат подобри услови за работа и исплата на додатоци за прекувремена работа, сменска работа, работа за време на празници и викенди. Според нивните најави, ова е предупредувачки штрајк што ги опфаќа сите копнени гранични премини во земјата.

Од македонското Министерство за внатрешни работи информираа дека граничните служби од македонска страна работат непречено и според редовните процедури. Посочуваат дека се ангажирани сите потребни човечки и технички ресурси и дека евентуалните задржувања ќе зависат исклучиво од динамиката на работа на грчките гранични служби. Граѓаните се повикуваат да бидат трпеливи и, доколку е можно, патувањето да го прилагодат на периодот по завршувањето на штрајкот.