Ретка серија астрономски феномени мже да се очекува денеска и тоа – утринска „парада на планети“, делумно затемнување на сонцето и врвот на метеорскиот дожд Персеиди. За да ги набљудувате, покрај ведрото небо, ќе треба да пронајдете места подалеку од градските светла и со отворен поглед на хоризонтот.
Првиот небесен спектакл започнува пред изгрејсонце, кога на небото ќе се појават шест планети: Јупитер, Меркур, Марс, Уран, Сатурн и Нептун.
Најдоброто време за набљудување е помеѓу 4:50 и 5:20 часот наутро. Планетите нема да формираат совршено права линија, туку ќе се протегаат во широк лак по должината на еклиптиката, од источниот хоризонт до југозападниот дел од небото.
Марс и Сатурн би требало да бидат најлесни за гледање со голо око. Меркур ќе биде многу ниско над источниот хоризонт, додека Јупитер може да биде уште потешко да се најде поради неговата близина до хоризонтот и утринската светлина. За да ги набљудувате Уран и Нептун, ќе ви треба двоглед или телескоп, како и астрономска мапа или апликација за навигација низ небото.
Експертите препорачуваат да изберете локација без згради, дрвја и ридови на исток. Ако среда наутро е облачно, сличен распоред на планетите ќе биде видлив во следните неколку утра.
Најинтересната глетка на неботоќе се случи вечерва. Според пресметката на Time and Date, делумното затемнување на сонцето во Скопје ќе започне во 19:29 часот.
Максимумот на затемнувањето се очекува во 19:36 часот, додека Сонцето ќе зајде околу 19.39 часот. Ова значи дека целиот настан ќе се случи многу ниско над западниот, или западно-северозападен, хоризонт. Ридовите, зградите или дрвјата затоа би можеле да го затскријат погледот дури и пред астрономското зајдисонце.
Целосното затемнување нема да биде видливо од Скопје. Целосната фаза ќе биде видлива од делови од Гренланд, Исланд, северна Русија, Шпанија и мал дел од Португалија, додека во поголемиот дел од Европа, вклучувајќи ја и Македонија, затемнувањето ќе биде делумно, наведува НАСА.
Особено е важно да се предупреди дека Сонцето не треба да се гледа со голо око во кое било време. Обичните очила за сонце, затемнетото или чаденото стакло не се доволна заштита. Потребни се сертифицирани очила за затемнување, или соларни филтри што го исполнуваат стандардот ISO 12312-2. Камерите, телескопите и двогледите мора да имаат и соодветен соларен филтер поставен пред оптиката.
Ноќ без месечина со Персеиди
По зајдисонцето, следува третиот дел од небесниот спектакл. Во ноќта помеѓу 12 и 13 август, Персеидите, еден од најпознатите и најактивните метеорски дождови, популарно познати како „солзите на Свети Лоренс“, ќе го достигнат својот врв.
Овогодинешниот максимум се совпаѓа со младата месечина, така што месечината нема да се меша во набљудувањето. Првите метеори можат да се видат кога ќе се стемни доволно, но најдобро време е по полноќ и пред зори.
Под идеални услови, може да се очекуваат помеѓу 80 и 100 метеори на час, иако бројот што еден поединечен набљудувач всушност ќе го види е обично помал и зависи од облачноста, светлосното загадување и отвореноста на небото.
Телескоп и двоглед не се потребни за Персеидите. Најдобро е да излезете надвор од градот, да пронајдете темно и отворено место, да ги исклучите телефоните и да почекате најмалку 20 до 30 минути очите да се навикнат на темнината. Персеидите изгледа дека доаѓаат од правецот на соѕвездието Персеј на североисток, но метеорите можат да се појават насекаде на небото.
ИЗДВОЕНИ
Македонија стиска палци за Никола Ѓуретановиќ – ќе се бори со европската елита!
Возачите чекаат решение на 1 септември во Брисел – ако нема договор, ќе следуваат протести
Колони на границите, гужви на патарините – повеќе М-тагови за помалку чекање
Не расте бројот на случаите, туку бруталноста: околу 50 пријави за врсничко насилство годишно
