Победата на ПСЖ во втор план поради „ѕверот“ на Астон Вила!

ПСЖ е најдобриот тим во светот и во тоа нема сомнение. Популарните „светци“ ја потврдија својата европска доминација во Салцбург со победа од 2:1 над Астон Вила во Суперкупот на УЕФА.

Избраниците на Луис Енрике доминираа во поголемиот дел од натпреварот и на крајот заслужено го кренаа новиот европски трофеј.

Сепак, вниманието на јавноста го украде 17-годишникот од редовите Астон Вила, Брајан Маџо, кој буквално е вистински напаѓачки ѕвер.

Кога ќе го погледнете на теренот, никој не би претпоставил дека е тинејџер. Висок е 193 сантиметри, има нереална сила и буквално ги издоминира  дефанзивците на ПСЖ.

Имаше неколку добри шанси, му недостасуваше повеќе искуство во финишот од акциите, но успеа да го постигне единствениот гол за Астон Вила.

ПСЖ поведе во 20-тата минута со прекрасниот погодок на Квича Кваратскелија. Во финишот од првото полувреме на сцена стапи Брајан Маџо кој лесно се ослободи од Пачо и погоди за 1:1.

Сепак, Парижаните успеаја да консолидираат, а решавачкиот момент дојде во 61-вата минута кога Дезире Дуе погоди за 2:1.

Брајан Маџо е роден во Англија и е син на поранешниот камерунски фудбалер Гај Маџо. Својата фудбалска кариера ја започна во Луксембург во тимот на Мариша Мерш, потоа играше за Рацин Унион, а потоа играше за академијата на Мец каде ги направи своите први сениорски чекори .

Неговиот квалитет беше препознаен од Астон Вила, која го донесе во јануари за дури 12 милиони евра.

Поради одредени неправилности, тој не можеше да игра за младинските категории на Вила во претходните месеци. Тренираше самостојно, а ова лето Арбитражниот суд за спорт му дозволи да се регистрира и да се појави во европските натпреварувања.

Несомнено е дека ќе слушнеме многу повеќе за овој играч кој игра навистина добро во предсезоната, а Вила доби неочекувано напаѓачко засилување за новата сезона во него.

Англичаните, секако, го искористија фактот дека е роден во Англија и го поканија во селекцијата до 17 години. Тој ја прифати поканата и ја напушти селекцијата на Луксембург, за чија А-тим одигра три натпревари.