По најавата за отворање на Ормускиот теснец, регистриран е пад цените на нафтата

Цените на нафтата паднаа, додека берзите пораснаа откако иранскиот министер за надворешни работи изјави дека Ормускиот теснец ќе остане целосно отворен за комерцијален сообраќај до крајот на периодот на прекин на огнот, објавува „Индекс“.

Цената на суровата нафта Брент, која е глобален репер, падна за девет проценти на 90 долари за барел. Американската сурова нафта WTI, која служи како репер за Соединетите Американски Држави, падна за 9,5 проценти на 82,60 долари за барел.

Во исто време, фјучерс договорите пораснаа на американските берзи. Фјучерс договорите на Dow Jones скокнаа за 560 поени, што е зголемување од 1,16 проценти. Фјучерс договорите на индексот S&P 500 пораснаа за 0,8 проценти, додека оние на Nasdaq 100 пораснаа за 0,9 проценти.

Светот мора да се подготви за „значително повисоки“ цени на енергијата доколку Ормускиот теснец не се отвори, предупреди шефот на Меѓународната агенција за енергија (ИЕА), Фатих Бирол.

Бирол додаде дека дури и ако клучниот превознички пат повторно се отвори, што се случи неодамна, цените на енергијата нема веднаш да се „вратат во нормала“. „Треба да се подготвиме за нестабилни пазари подолг период“, изјави тој за швајцарскиот весник „Ноје Цирхер Цајтунг“.

Тој, исто така, предупреди дека зголемувањето на цените ќе се почувствува низ целиот свет и дека пазарите досега го потцениле влијанието на војната. Причината, рече тој, е што танкерите за нафта и гас што веќе биле на пат пред почетокот на конфликтот оттогаш стигнале до своите дестинации. Овие пратки досега „го ублажиле ефектот“ од војната, но во март не биле натоварени нови танкери, изјави тој за весникот.

Шефот на ИЕА додаде дека ќе бидат потребни околу две години за да се врати производството на енергија изгубено на Блискиот Исток по војната со Иран, истакнувајќи дека темпото на закрепнување ќе варира од земја до земја.