Плата под 30.000 денари земаат 154.408 работници во државава

Претседателот на Сојузот на синдикатите на Македонија, Слободан Трендафилов, истакна дека над 154.000 работници во земјава примаат плата под 30.000 денари, што е под прагот на сиромаштијата, и ги повика сите да се приклучат на протестот за зголемување на минималната плата на 14 март, во Скопје.

– 154.408 работници имаат плата под 30.000 денари и имаат огромна причина да протестираат за зголемување на минималната плата. Според податоците од Управата за јавни приходи, во Македонија, бројот на работници што примаат плата изнесува 503.031. Прагот на сиромаштија во Македонија изнесува 31.200 денари, а една третина од работниците во Македонија живеат со примања под прагот на сиромаштијата, односно работат, а се сиромашни! Борбата на Сојузот на синдикатите на Македонија за зголемување на минималната плата значи директно зголемување на платите на овие 154.408 работници, кои имаат огромна причина да се борат за зголемување на својата  плата и да излезат на протест. Ги повикуваме сите работници, нивните најблиски, ги повикуваме и овие 154.408 работници да се придружат на протестот, кој ќе започне на 14 Март, во 12.05 ч., од пред Работничкиот дом во Скопје и кој ќе продолжи пред Собранието, Стопанската комора и Владата. ССМ излегува да се бори за зголемување на работничките плати, а работниците треба да излезат да се борат за својата плата, затоа што зголемувањето на минималната плата значи зголемување на сите други плати – вели Трендафилов.