Пентагон донесе конечна одлука: Ја запира употребата на алатките за вештачка интелигенција на „Антропик“

Министерството за одбрана на САД официјално ја прекина употребата на алатките за вештачка интелигенција на „Антропик“, со што заврши процесот на постепено отстранување на технологијата на компанијата од системите на американската војска.

Одлуката доаѓа по повеќемесечен процес, откако „Антропик“ беше прогласен за ризик за синџирот на снабдување од аспект на националната безбедност. Иако Пентагон сега потврди дека повеќе не ги користи производите на компанијата, неколку анонимни извори за Би-би-си тврдат дека моделите на „Антропик“ биле во употреба до пред само неколку дена.

Причината за постепеното отстранување била и техничката зависност од технологијата. Според Би-би-си, воените аналитичари длабоко го интегрирале моделот „Клод“ во „Maven Smart System“ – разузнавачка платформа управувана од „Палантир“, која се користи за организирање и обработка на снимки од беспилотни летала и сателити.

Поранешни претставници на одбраната и истражувачи од Универзитетот Џорџтаун посочуваат дека замената на напреден модел на ВИ, еднаш интегриран во сложен систем како „Мејвен“, е сложен инженерски процес кој бара повеќе чекори.

Воениот персонал го користел „Клод“ за обработка на големи количества визуелни податоци и изработка на кратки оперативни извештаи наменети за високите команданти. Поради тоа, целосното отстранување на технологијата било отежнато, особено додека траеле активни разузнавачки операции.

Спорот меѓу Пентагон и „Антропик“ започна по барањето на компанијата да се задржат одредени етички ограничувања при употребата на нејзините модели од страна на американската војска. „Антропик“ инсистирал технологијата да не се користи за масовен надзор врз американски граѓани и во системи за автономно оружје.

Пентагон ги отфрлил овие барања и упатил закани кон компанијата, но „Антропик“ не отстапил од својот став. Потоа Пентагон ја прогласил компанијата за безбедносен ризик и започнал со отстранување на нејзината технологија. Во моментов се водат и правни постапки поврзани со спорот.

Истовремено, според информациите на „The Information“, употребата на моделите на „Антропик“ се намалува и кај некои од големите корпоративни клиенти. „Мета“ и „Мајкрософт“ ги засилуваат напорите нивните вработени да користат сопствени решенија за вештачка интелигенција.

Според извештајот, внатрешните трошоци на „Мајкрософт“ поврзани со „Клод“ се за една третина пониски од претходно проектираната сума од најмалку една милијарда долари за оваа година. Во „Мета“, пак, наводно околу 30.000 од вкупно 60.000 вработени го користат „Claude Code“, асистентот за програмирање на „Антропик“.

Не е јасно какво влијание ќе имаат овие промени врз деловното работење на „Антропик“, особено во пресрет на планираната иницијална јавна понуда на акции на компанијата.