Пакистан сѐ уште чека одговор од Иран за мировните преговори

Пакистан, земјата-посредник, сè уште не добил официјален одговор од Иран за тоа дали ќе испрати делегација на втората рунда разговори со САД, изјави во вторник министерот за информации во Исламабад.

– Официјалниот одговор од иранската страна за потврдата на делегацијата за учество во мировните преговори во Исламабад сè уште се чека – објави министерот Атаула Тарар на платформата X, нагласувајќи дека одлуката е „критична“ бидејќи остануваат само неколку часа до истекот на двонеделното примирје постигнато меѓу завојуваните страни.

Претседателот Доналд Трамп во вторник изјави дека не сака да го продолжи примирјето во војната меѓу САД и Израел против Иран и дека американската војска е „подготвена да дејствува“ доколку разговорите не бидат успешни.

Вашингтон изрази увереност дека последните разговори со Иран ќе продолжат во Пакистан, а висок ирански функционер изјави дека Техеран размислува да се придружи. Сепак, со последните часови од двонеделното примирје, останува малку време, пренесува Ројтерс.