Општините добиваат стручна помош, во функција се веќе  170 експерти

Министерството за локална самоуправа, преку Ресурсниот центар за поддршка на развојот на општините, по првиот пресек на пристигнатите апликации, ја формираше првичната база од 170 експерти и практичари, со што се поставува силна основа за навремена, стручна и целна поддршка на општините во решавање на конкретни локални предизвици, истакна министерот за локална самоуправа, Златко Перински.

Тој наведе дека со самото тоа, базата на експерти е ставена во функција, а општините можат, согласно со своите потреби, да користат професионална поддршка во различни области.

– Областите на потребна експертиза се поврзани со изворните надлежности на општините, но и пошироко, опфаќајќи сектори кои имаат значајно влијание врз функционирањето на локалната самоуправа, подобрувањето на услугите кон граѓаните и креирањето на стратешки решенија за долгорочен развој – појасни Перински.

Воедно, од Министерството за локална самоуправа информираат дека од вчера е повторно отворен јавниот повик за изразување интерес за вклучување во базата на експерти на Ресурсниот центар.

– Повикот ќе биде континуирано отворен, со цел сите заинтересирани професионалци со соодветна експертиза и искуство да имаат можност да аплицираат и да се вклучат во базата на експерти, придонесувајќи кон обезбедување квалитетна и навремена поддршка за општините – нагласуваат од Министерството.