Охрид на мапата на европските културни маршрути на Советот на Европа

На Генералното собрание одржано во Аквилеа, Италија, Охрид беше вклучен во мрежата на градови и локалитети што се поврзани преку заедничките европски вредности, културното наследство и историското паметење. За Општина Охрид, ова признание претставува потврда за историската и цивилизациска улога на Охрид како духовен и културен центар во словенскиот свет, поврзан со делото на светите Кирил и Методиј и нивните ученици, свети Климент и свети Наум, кои токму во Охрид ја поставиле основата на словенската писменост и духовност

Охрид официјално стана дел од европските културни маршрути на Советот на Европа, со што уште еднаш го потврди своето место на европската културна и духовна мапа.

На Генералното собрание одржано во Аквилеа, Италија, Охрид беше вклучен во мрежата градови и локалитети што се поврзани преку заедничките европски вредности, културното наследство и историското паметење.

За Општина Охрид, тоа признание претставува потврда за историската и цивилизациска улога на Охрид како духовен и културен центар на словенскиот свет, поврзан со делото на светите Кирил и Методиј и нивните ученици, свети Климент и Свети Наум, кои токму во Охрид ја поставиле основата на словенската писменост и духовност.

– Приклучувањето кон европските културни маршрути отвора нови можности за меѓународна соработка, културна размена и развој на културниот туризам, со што Охрид дополнително ќе се позиционира како препознатлива европска дестинација. Општина Охрид останува посветена на зачувувањето, унапредувањето и меѓународната промоција на своето богато културно наследство, како и на активното учество во европските културни процеси – велат од Општина Охрид.

На церемонијата во Италија, свое обраќање имал и претседателот на Советот на Општина Охрид, Перчо Божиновски, кој ја истакнал важноста на признанието, како и улогата на Охрид како „жива ризница на културно наследство и светилник на словенската писменост и духовност“.

Како што посочил тој, Охрид, како духовна престолнина на словенството, со векови ја чува оваа светлина и оти Охрид не е само географска точка туку и жива ризница на културно наследство, место каде што историјата, верата и уметноста се преплетуваат во едно уникатно духовно искуство.

– Ова признание не само што ја потврдува нашата историска улога туку и ја отвора вратата за нови можности за соработка, културна размена и одржлив развој. Оваа маршрута не е само патека на движење туку и мапа на духовното и културното дејствување, која ги поврзува локалитетите, традициите и вредностите што ја обликувале Европа. Охрид, со своите манастири, цркви, археолошки локалитети и богато културно наследство, претставува клучна точка во оваа мрежа. Во таа насока, културниот туризам во Охрид се развива како автентично искуство – како патување низ времето, каде што секој чекор ја раскажува приказната за писменоста, верата и за идентитетот. Посетителите не доаѓаат само да видат туку и да почувствуваат – нагласил Божиновски.

Притоа, посочил дека современото чествување на делото на светите Кирил и Методиј, особено на 24 Мај, што, традиционално, го организира Општина Охрид, претставува жив доказ дека ова наследство не е само минато туку и дел од нашата сегашност и нашата иднина.