Митева: Владата формира Национален комитет за заштита и безбедност на новинарите

Владата на денешната седница донесе одлука за формирање Национален комитет за заштита и безбедност на новинарите, со цел унапредување на нивната безбедност, превенција од закани и создавање услови за слободно извршување на професијата.

Комитетот има за задача да ја следи состојбата на терен, да ја подобри соработката меѓу институциите и медиумската заедница, како и да изработи соодветна рамка за дејствување.

– Националниот комитет ќе има задача да ја следи состојбата со безбедноста на новинарите, да ја унапредува соработката меѓу институциите и медиумската заедница и да изработи Национален акциски план за заштита и безбедност на новинарите најдоцна до 15.12.2026 година, во согласност со европските стандарди и меѓународните препораки – изјави портпаролката на Владата, Марија Митева.

Акцискиот план ќе се фокусира на четири основни области: превенција, заштита, ефикасно гонење на сторителите и промоција со едукација. Во него ќе бидат предвидени механизми за итна реакција, полициска и правна поддршка, заштита од закани во дигиталниот простор и брзи истраги при евентуални напади.

Во состав на новоформираниот Комитет ќе учествуваат претставници од МВР, Министерството за правда, Министерството за дигитална трансформација, АВМУ, Академијата за судии и јавни обвинители, МРТ и Здружението на новинарите на Македонија (ЗНМ). Body-то ќе ја поддржи и националната примена на кампањата на Советот на Европа „Новинарите се важни“.

– Вие имате право да прашувате, ние имаме обврска да одговараме. Вие имате право да ја преиспитувате работата на институциите, ние имаме обврска да ја образложиме. И кога нашите ставови се различни, тоа никогаш не ја намалува вредноста на професионалниот дијалог, туку ја потврдува неговата неопходност – порача Митева.