Украина го отфрли предлогот на САД за прекројување на границите на регионите Доњецк и Луганск – потег со кој пратениците на Белата куќа се обидоа да ѝ овозможат на Москва да преземе контрола врз целиот Донбас, без притоа да мора да ги заземе градовите што сè уште се под контрола на украинските сили, пренесува „Киев пост“.
Според предлогот, административните граници на овие региони би се измениле за да се усогласат со линијата на фронтот, додека преостанатите области под украинска контрола би биле исклучени од дефиницијата за Донбас. Ова би му донело на Владимир Путин симболична победа, без потреба од дополнителни територијални освојувања.
Планот беше предложен од специјалните пратеници на американскиот претседател Доналд Трамп, Стив Виткоф и Џаред Кушнер, во обид да се заобиколи главната пречка за мировен договор: барањето на Русија за предавање на приближно 5.000 квадратни километри територија што руската војска не успеала да ја заземе.
Киев веднаш го отфрли предлогот, наведувајќи дека никогаш нема да ја признае руската окупација.
„Украинската делегација никогаш не разговарала за отстапки во однос на окупираните територии. Украина никогаш нема да го признае ова – ниту ‘де факто’, ниту ‘де јуре’. Тоа отсекогаш бил нашиот став на преговарачката маса“, изјави неименуван извор од украинскиот преговарачки тим.
Првата рунда разговори во Абу Даби траеше четири и пол часа. На самиот почеток, Џаред Кушнер изјави дека Вашингтон верува оти Путин е отворен за мир, под услов да се исполнат одредени услови. Сепак, руските барања остануваат неприфатливи за Киев.
Путин бара целосно повлекување на украинските сили од Донбас, како и признавање на руската анексија на четири украински региони и Крим – услови што претседателот Володимир Зеленски постојано ги отфрла.
Зборувајќи од Копенхаген во вторникот, Зеленски ги обвини руските преговарачи дека му презентирале лажни информации на Вашингтон во врска со ситуацијата на линијата на фронтот. Тој тврди дека Москва прикажува дека контролира значително поголема територија отколку што навистина контролира. Според Зеленски, руската страна им кажала на Американците дека држи половина од територијата што сè уште ја брани украинската војска – тврдење кое Киев го поби со снимки и фотографии од бојното поле.
И покрај несогласувањата околу територијата, Зеленски го опиша првиот ден од преговорите како суштински. Тој истакна дека разговорите се фокусирале и на хуманитарни прашања и безбедносни гаранции. Предлозите вклучуваа размена на воени заробеници од голем обем, во која би биле опфатени меѓу 1.000 и 1.500 лица од секоја страна.
Дискусиите опфатија и безбедносни механизми осмислени да спречат повторен руски напад по евентуален прекин на огнот. Украина инсистира на правно обврзувачки гаранции, наместо на политички ветувања што некоја идна американска администрација би можела да ги поништи. Меѓу разгледуваните опции се билатерален договор со Соединетите Држави или европска „Коалиција на подготвени“ (coalition of the willing), поддржана од Вашингтон. Истовремено, Киев не се откажа од својата цел за членство во НАТО. Руската делегација, пак, бара сопствени безбедносни гаранции и повторно ги изнесува барањата за ограничување на военото присуство на НАТО во Источна Европа. Зеленски изјави дека е подготвен директно да разговара со Путин, со посредство на САД и Европа.
ИЗДВОЕНИ
Компаниите ќе можат да исплаќаат плати и придонеси од сметките на „Алта банка“
Екс членот на ДИК, Субхи Јакупи, познат по бонусите што си ги поделил со колеги за избори, стана претседател на Управниот суд
Мицкоски ветува нов сопственик, Филипче предупредува за ризиците, се отвори темата за наводните врски на ДУИ со Алта банка Србија
Обвинителството и МВР без детали за фемицидот во Богданци, женските организации бараат истрага за пропустите на институциите
