Компаниите ќе можат да исплаќаат плати и придонеси од сметките на „Алта банка“

Народната банка продолжува со постепено ублажување на ограничувањата за клиентите на „АЛТА банка“ АД Битола. Со најновата измена на Решението за администрација, на компаниите кои редовно исплаќале плати преку оваа банка во изминатите три месеци им се овозможува повторно да вршат исплата на плати, како и уплата на соодветните даноци и придонеси.

Олеснувањето се однесува на фирмите за кои исплатата на плати преку „АЛТА банка“ била редовна практика во трите месеци пред донесувањето на одлуката. Притоа, дозволениот износ за исплата може да биде до пет проценти повисок од вкупната сума на платите исплатени во октомври.

Со оваа мерка се овозможува континуитет во исплатата на личните доходи и навремено исполнување на обврските кон вработените и државата, додека истовремено се задржува контролата врз одливот на средства од банката.

Дополнително олеснување добиваат и граѓаните. Физичките лица ќе можат во целост да располагаат со новите приливи на нивните сметки во „АЛТА банка“, доколку средствата се префрлени од платежни сметки отворени во други банки или кај други даватели на платежни услуги. За овие приливи нема да има ограничување на износот што може да се користи.

Од Народната банка посочуваат дека внимателно ја следат состојбата во „АЛТА банка“ АД Битола и дека мерките постепено се приспособуваат во согласност со условите за работење на банката и потребите на нејзините клиенти.

Приоритет, како што нагласуваат, остануваат заштитата на интересите на клиентите, постепеното олеснување на ограничувањата и одржувањето соодветна контрола врз финансиските текови од банката.