Од април поскапуваат цените на авиобилетите

Со последните скокови на цените на нафтата и на авионското гориво, авиокомпаниите се соочуваат со значително зголемување на трошоците за операции. Горивото може да сочинува и до 30-40 % од вкупните трошоци на една авиокомпанија, па секој раст на цената директно се рефлектира на билетите за патниците.

Со растот на цените на горивото, авиокомпаниите се принудени да ги зголемат цените на билетите. Тоа е начин да се надомести дополнителниот трошок и да се зачува профитабилноста. Авиокомпаниите користат системи што ја следат побарувачката и автоматски ги приспособуваат цените. Со почетокот на пролетната сезона и растот на патувањата, билетите од април, па натаму може значително да поскапат, особено за популарните дестинации.

Некои авиокомпании инвестираат во алтернативни и еколошки горива. Иако е тос позитивен чекор за животната средина, за краток рок овие инвестиции го зголемуваат оперативниот трошок, кој патниците го чувствуваат преку повисоки цени на билетите.

Можно е зголемување на цените на сите видови билети, особено за долгите летови и меѓународните релации. Промоции и попусти ќе се забележат повеќе кај кратките или регионалните летови, каде што конкуренцијата е поголема. Резервирањето однапред може да помогне да се избегнат највисоките цени, бидејќи динамичкото ценообразување ги зголемува цените на билетите блиску до датумот на летот.

Растот на цените на горивото директно влијае на авионските билети и од април се очекува постепено зголемување на цените. Патниците треба да бидат подготвени и да ги резервираат билетите однапред, особено за меѓународните летови и за летовите во високата сезона. Со правилно планирање, може да се минимизираат дополнителните трошоци и да се избере најдобрата опција за патување.

Анализите на „Фајненшл тајмс“ и на други релевантни извори покажуваат дека ќе растат цените на авиобилетите, во услови на зголемени трошоци за гориво, геополитички ризици и ограничен капацитет во авиосообраќајот.

Според „Фајненшл тајмс“, авиоиндустријата веќе неколку години се соочува со тренд на поскапување, при што во одредени периоди цените на билетите растеле и до двоцифрени стапки, како резултат на повисоките оперативни трошоци и големата побарувачка. Иако имаше сигнали за стабилизација, новите глобални ризици повторно го враќаат притисокот врз цените.

Според податоци од индустријата, авионското гориво учествува со над 20 проценти во трошоците на авиокомпаниите, а во март годинава неговата цена нагло порасна – за повеќе од 50 проценти за само две недели. Тоа директно се прелева во цените на билетите.

Паралелно, големите авиокомпании веќе преземаат конкретни чекори. Дел од нив, пишува „Гардијан“, ги намалуваат летовите или воведуваат доплата за гориво, додека други директно ги зголемуваат цените. Во Европа, водечките превозници предупредуваат дека не може бесконечно да ги апсорбираат трошоците и дека е неизбежно поскапувањето за патниците.

Дополнителен притисок доаѓа и од промените на маршрутите. Поради нестабилноста на Блискиот Исток, летовите се пренасочуваат, што ги продолжува патувањата и ја зголемува потрошувачката на гориво. Тоа, пак, значи помал капацитет и повисоки цени, особено за интерконтиненталните линии.

Експертите предупредуваат дека оваа комбинација – скапо гориво, геополитички ризици и ограничена понуда може да доведе до нов бран поскапувања во текот на годинава.

– Ако размислувате да резервирате лет, најдобро е да го направите тоа сега – советуваат аналитичарите од индустријата, посочувајќи дека неизвесноста најчесто значи повисоки цени во иднина.