Полскиот премиер Доналд Туск вчера им се обрати на пратениците и на Полјаците во Сејмот на полскиот парламент за да предупреди на најверојатното сценарио за есента и зимата, во кое Русија би тргнала во големи разурнувања во Украина, а истовремено, наводно случајно, би упаѓала со дронови на територијата на сојузниците во НАТО за да ја ослаби вербата на Европјаните во колективната одбрана.
„Постои реален ризик на територијата на некоја од земјите на источното крило на НАТО да упаѓаат дронови или ракети, дури и со разурнувања, а официјалниот наратив (на Москва) ќе биде дека тоа е сосема случајно и дека нема причина за каков било одговор на НАТО“, рече Туск.
Целта на тие очекувани руски дејствија, според зборовите на полскиот премиер, е постепено слабеење на довербата на Европјаните во Членот 5 од Договорот на НАТО за колективна одбрана и посејување сомнеж дека НАТО е гарант само на зборови, на хартија.
„Инцидентите би се повторувале за да покажат дека целиот НАТО пакт е беспомошен и слаб“, рече Туск.
Полскиот премиер изјави дека од информациите за текот на американско-руските разговори недвосмислено произлегува дека Русија не е подготвена за преговори ниту за прекин на огнот, а камоли за мир, без де факто капитулација на Украина.
„Кремљ, во најмала рака до крајот на зимата, не е заинтересиран за никакви преговори. Убедени се дека зимата од разни причини за Украина ќе биде трагично критична. Анализите велат дека Русија замислува да ги разори граничните премини на украинската, а можеби и низ инциденти и на полската и молдавската страна“, рече Туск.
Премиерот Туск предупреди дека во тој случај сојузниците нема да можат да им притекнат на помош на Украинците, да им испратат генератори или гориво, додека истовремено Русија, според разузнавачките анализи, смета на интензивни напади во текот на есента и зимата врз украинската економија и логистика.
„Русија одлучи да примени нова стратегија во војната. Пред сè, да ги уништи во што поголема мера економијата и логистиката на Украина. Се очекуваат зачестени интензивни напади врз шест големи украински градови, а цел е и железничката инфраструктура“, рече Туск.
Полскиот премиер предупреди дека ваквото најверојатно црно сценарио бара од Полјаците да бидат ментално подготвени да положат тешки испити и апелираше до полската опозиција во иднина повеќе да не се појави ниту еден глас што би го подрил имиџот на Полска како доверлив сојузник.
„Многу политички сили кои моментално стекнуваат популарност во европските земји само чекаат алиби за да не ги даваат своите животи за Полска, Летонија и Литванија, ако Полска рекла дека ни таа нема да ги дава своите животи. Членот 5, сојузничката лојалност, верноста кон обврските мора да стане наш бренд. Сите сојузници мора да знаат дека можат да се потпрат на нас“, изјави Туск.
Полскиот премиер ја предупреди опозицијата дека Полска е земја скоро на самиот фронт на руско-украинската војна и дека на неа прво ќе ѝ биде потребна солидарноста од земји како Ирска или Португалија.
