„Њујорк тајмс“: САД трупаат сили околу Иран, се планира нов напад

Американската војска подготвува опции за рестартирање на големите борбени операции против Иран, иако претседателот Доналд Трамп досега не покажа подготвеност за нова, голема ескалација на војната.

Во исто време, голема американска воена сила се собира во регионот. Три носачи на авиони наскоро треба да бидат на Блискиот Исток, што би било првпат од 2003 година три американски носачи да бидат распоредени таму истовремено, пишува „Њујорк тајмс“. Трамп, сепак, во последните месеци постојано ги отфрла предлозите за големи напади врз Иран или Хутите во Јемен. Во четвртокот, тој рече дека САД нема да го нападнат Иран пред среднорочните избори во ноември и дека двете земји водат „продуктивни разговори“.

Високи американски безбедносни претставници, предводени од потпретседателот Џ.Д. Венс, разговараа за нови опции за напад минатиот петок, во Кемп Дејвид. Според луѓе запознаени со предлогот, планот се базира на кратка и интензивна кампања што би траела околу три дена. Главни цели би биле иранските ракети и беспилотни летала, а како цели се споменуваат и енергетски објекти и командни места на Револуционерната гарда. Американските претставници проценуваат дека Иран ги подобрил своите воени тактики во последните месеци и станал потежок противник.