Нови правила: Влезот на јавната плажа се наплаќа 10 евра, а на туристите на возраст меѓу 10 и 65 години им е забрането да поставуваат чадори!

Локалните власти во италијанскиот регион Сардинија им забранија на лицата на возраст меѓу 10 и 65 години да поставуваат чадори за сонце на плажата Пунта Молентис, како дел од новите еколошки мерки на една од најпознатите плажи на југоисточниот брег на островот.

Мерката беше воведена во градот Виљасимиус, а единствениот исклучок се однесува на семејствата со деца под 10 години и лица над 65 години, на кои им е дозволено да постават по еден чадор за сонце.

Посетителите исто така мора да платат десет евра за да влезат на плажата, иако станува збор за јавна плажа.

Одлуката предизвика бројни реакции од јавноста и туристите, од негодување до иронични коментари на социјалните мрежи.

Некои посетители предупредија и на можни здравствени ризици, вклучувајќи сончаница, топлотен удар и зголемена изложеност на штетно сончево зрачење, пишува The Guardian.

Властите во Виљасимиус ги оправдаа новите мерки со потребата да се заштити природната убавина на Пунта Молентис, која се наоѓа во заштитено подрачје. Плажата повторно се отвора откако беше затворена од минатиот јули поради катастрофален пожар предизвикан од пиромани.

Општината соопшти дека пожарот и исклучителните временски услови на море доведоа до потреба од построги правила за ограничување на човековото влијание и зачувување на областа за идните генерации.

Покрај чадорите за сонце, забрането е поставување летниковци, шатори и други структури за заштита од сонцето. Правилата ќе останат на сила до крајот на октомври.

Новите ограничувања во Сардинија доаѓаат во време кога Италија сè уште се бори со долгогодишна дебата за користењето на јавните плажи и пристапноста на брегот за граѓаните.

На плажата Јесоло, во близина на Венеција, властите го намалија бројот на лежалки и чадори за сонце, со цел да се создаде повеќе простор помеѓу посетителите.

Италијанските јавни плажи често се преполни, особено поради зголемувањето на цените за изнајмување лежалки и чадори за сонце на приватни плажи.

Според податоците од најголемата италијанска организација за заштита на потрошувачите „Алтроконсумо“, просечната цена за изнајмување две лежалки и чадор во приватни концесии се зголемила за 24 проценти во последните пет години, а за шест проценти само во последната година.