Унгарската министерка за надворешни работи, Анита Орбан, изјави дека поднела кривична пријава против поранешниот министер Петер Сијарто и неговиот тим.
Поплаката произлегува од редовното користење скапи приватни чартер-летови наместо редовни комерцијални летови во текот на изминатите четири години, објави британската новинска агенција „Ројтерс“.
Извештајот поднесен од министерката Анита Орбан претставува најнов во низата наоди на новата влада како дел од нејзината кампања против корупцијата, по преземањето на власта од страна на премиерот Петер Маѓар – кој го наследи Виктор Орбан (кој владееше 16 години) по убедливата изборна победа во април.
Орбан ги отфрли обвинувањата за корупција. Неговиот портпарол, Берталан Хаваши, во писмен одговор до „Ројтерс“ изјави дека летовите на министерот за надворешни работи биле целосно во согласност со соодветната владина уредба.
„Во последниве години, службените патувања за Министерството за надворешни работи и трговија се организирани со примерна ефикасност“, рече Хаваши, додавајќи дека поради тоа Сијарто заслужува пофалби, а не политички мотивирани напади.
Во видео објавено денес на Фејсбук, Анита Орбан изјави дека немало никакви индиции за обид за заштеда на средства при организирањето на патувањата за Сијарто и неговиот тим.
Таа истакна дека документите и истрагата откриваат оти овие патувања – реализирани меѓу 2022 и 2026 година – чинеле во просек речиси шест пати повеќе (поточно, четири милијарди форинти или 12,6 милиони долари повеќе) отколку што би чинеле стандардните билети за бизнис-класа.
„Откриените факти, според тоа, будат сомнеж за лошо управување со средствата што резултирало со значителна финансиска загуба, а исто така го отвораат и прашањето за одговорноста на поранешното раководство на министерството“, додаде таа.
