Напната ситуација над Балтикот: НАТО пресретнал руски бомбардери и ловци

Авиони на НАТО пресретнале руски стратешки бомбардери и ловци над Балтичкото Море. Во акција на источното крило на Сојузот учествувале француски ловци „Рафал“, полетувајќи од воздухопловната база во Литванија, каде што се стационирани како дел од долгогодишната мисија за воздушно набљудување на НАТО, објави „Еуроњуз“.

Француските ловци, вооружени со ракети воздух-воздух, им се придружија на авиони од Шведска, Финска, Полска, Данска и Романија. Сите полетаа за да ја следат руската формација, соопшти францускиот одред.

Според информациите, руската мисија вклучувала два суперсонични бомбардери Ту-22М3 и десетина ловци Су-30 и Су-35, кои наизменично ги придружувале бомбардерите.

Руското Министерство за одбрана соопшти дека летот на бомбардерот со долг дострел бил планиран и се одвивал во воздушниот простор над неутралните води на Балтичкото Море. Летот траел повеќе од четири часа.

„За време на одредени делови од рутата, бомбардерите биле придружувани од ловци од странски земји“, се вели во соопштението.

Додаваат дека руските екипажи на авиони со долг дострел редовно летаат над неутралните води на Арктикот, Северниот Атлантик, Тихиот Океан, Балтичкото и Црното Море, во согласност со меѓународните правила.

НАТО редовно ги испраќа борбените авиони за да ги пресретнат руските авиони што се приближуваат или летаат блиску до воздушниот простор на алијансата.

НАТО вели дека руските авиони често не користат транспондери, не комуницираат со контролата на воздушниот сообраќај ниту известуваат за планови, поради што авионите се испраќаат поради идентификација.

Многу од овие летови се поврзани со руската енклава Калининград. Дури и пред војната во Украина, НАТО пресретнувал руски авиони околу 300 пати годишно, главно над северна Европа.

Литванското Министерство за одбрана соопшти дека авионите на НАТО биле испратени четири пати помеѓу 13 и 19 април поради кршење на правилата за воздушниот простор.