Најсилниот земјотрес во повеќе од еден век ја погоди Венецуела: „Спасувачите копаат со голи раце. Секоја минута е клучна“

Најмалку 32 лица загинаа, а повеќе од 700 се повредени во двата земјотреси со магнитуда од 7,2 и 7,5 степени што ја погодија Венецуела, изјави денеска привремената претседателка Делси Родригез, прогласувајќи вонредна состојба.

Таа нагласи дека сè уште нема информации за државата Гуарија, која се наоѓа во близина на главниот град и која, како што рече, е најтешко погодена.

Земјотресите го погодија северниот дел на Венецуела, западно од Каракас.

Родригез прогласи вонредна состојба откако два земјотреси и последователни потреси ја погодија земјата, уривајќи згради во главниот град Каракас и на други места.

Вториот земјотрес, кој ја погоди Венецуела само неколку моменти по првиот, беше најсилниот што ја погодил земјата за повеќе од сто години.

Ова го објави CNN, повикувајќи се на податоци од Геолошкиот завод на САД (USGS).

Најсилниот земјотрес некогаш регистриран во Венецуела бил во 1900 година, кога земјотрес со магнитуда од 7,7 степени го погодил северниот брег, недалеку од главниот град Каракас.

Епицентарот на тој историски земјотрес бил само неколку стотици километри од епицентарот на синоќешните земјотреси.

Вториот земјотрес синоќа, со магнитуда од 7,5, сега е втор најсилен во историјата на Венецуела.

Првиот земјотрес, кој се случи помалку од една минута порано и имаше магнитуда од 7,2 степени, е четвртиот најсилен досега регистриран во земјата.

Никој сè уште не знае колку луѓе се заробени под урнатините низ Венецуела, јавува Скај њуз од САД. Очајничките операции за спасување се во тек… секоја минута е клучна. Луѓе и животни се спасуваат од урнатините, а спасувачите копаат со голи раце“, објави американската мрежа.

Еден жител рече дека тоа бил најсилниот потрес што некогаш го почувствувал, додавајќи дека земјотресот бил „долг“ и „исклучително силен“.

Келнер рече дека луѓето истрчале на улиците во паника, но „многумина немале време да избегаат“, додека властите предупредија на „катастрофа од големи размери“.

🚨Un hombre grita: "mamá", con la esperanza de que su madre responda. Vivían en el edificio Rita de San Bernardino en Caracas. #Venezuela pic.twitter.com/PTIIppOLvm

— Cristian Crespo F. 🇨🇺 (@cristiancrespoj) June 25, 2026

Крајбрежната држава Ла Гваира во северна Венецуела претрпе најголемо уништување и беше прогласена за зона на катастрофа, рече Родригез.

Таа ја опиша ситуацијата во државата како „вистинска трагедија“, истакнувајќи дека десетици згради се урнале. Меѓу нив беше и голем хотел на плажа во градот Макуту, кој беше речиси целосно срамнет со земја.

Во градот Катија Ла Мар, видео снимките покажаа неколку урнати згради и сериозно оштетени облакодери.

Во Ла Гваира се наоѓа меѓународниот аеродром Симон Боливар, главниот аеродром што го опслужува Каракас.

Родригез рече дека аеродромот е затворен поради „сериозни штети на инфраструктурата“. Видео снимките покажаа патници како бегаат во паника, со делови од терминалот покриени со урнатини и прашина, а таваните оштетени.

Николас Мадуро Гера, син на соборениот претседател Николас Мадуро, изјави за CNN дека има извештаи за уривање на четири згради во главниот град – две во населбата Сан Бернардино, една во Пинто Салинас и една во Ел Параис.

Населбата Сан Бернардино на север од Каракас беше особено тешко погодена. Снимките покажуваат како спасувачките екипи извлекуваат преживеани од урнатините, додека жителите опишуваат драматично бегство од оштетените згради.

Земјотресите ги погодија и северозападните федерални држави Арагва, Карабобо и Фалкон, каде што беа регистрирани прекини во снабдувањето со електрична енергија во некои области, рече Родригез.