Нагло поскапе храната во светот!

Светските цени на храната се искачија на четиримесечен максимум во февруари, соопшти денес Организацијата за храна и земјоделство на Обединетите нации (ФАО).

Индексот на цените на храната (FFPI) на ФАО, кој ги следи месечните трендови на глобалните цени на земјоделските производи, се зголеми за прв пат по пет месеци на 125,3 поени, што е за 0,9 проценти повеќе од јануари.

Индексот на цените на житарките се зголеми за 1,1 процент од јануари на 108,6 поени, бидејќи цените на пченицата се зголемија поради мразови и ризици од оштетување на посевите во делови од Европа и САД, како и логистички проблеми во Русија и тензиите во регионот на Црното Море.

Дополнително, индексот на цените на растителното масло се зголеми за 3,3 проценти на 174,2 поени, што е највисоко ниво од јуни 2022 година, главно поради зголемувањето на цените на палминото, соиното и маслото од репка, додека цените на сончогледовото масло малку се намалија.

Индексот на цените на месото се зголеми за 0,8 проценти на месечно ниво, на 126,2 поени и сега е околу осум проценти повисок отколку пред една година, при што цените на говедското и овчо месо значително се зголемија, додека цените на свинското и живинското месо се зголемија незначително.

Спротивно на тоа, индексот на цените на млечните производи падна за 1,2 проценти на 119,3 поени, главно поради пониските цени на сирењето, додека цените на шеќерот паднаа за 4,1 процент на 86,2 поени, достигнувајќи го најниското ниво од октомври 2020 година, поради очекувањата за изобилство на глобална понуда.

FFPI е дополнително намален за еден процент во споредба со февруари 2025 година и за 21,8 проценти во споредба со рекордните максимуми забележани во март 2022 година, се додава во извештајот на веб-страницата на ФАО.