Голем пожар избувнал ноќеска во трговски центар во скопската општина Шуто Оризари, при што целосно или делумно биле опожарени над 20 дуќани со текстилна и друга роба. За среќа, во пожарот нема повредени лица, но причинета е голема материјална штета.
Од Министерството за внатрешни работи информираат дека пожарот бил пријавен во СВР Скопје денеска, околу 03:20 часот. Опожарените дуќани се сопственост на лице со иницијали С.С., а биле дадени под закуп.
„Денеска (11.09.2026) околу 03:20 часот во СВР Скопје е пријавено дека во трговски центар на подрачјето Шуто Оризари опожарени биле над 20 дуќани со текстилна и друга роба сопственост на С.С. кои ги има дадено под закупнина. Пожарот бил изгаснат од Бригадата за противпожарна заштита-Скопје. Повредени лица нема“, соопшти МВР.
Во гаснењето на пожарот биле ангажирани 15 пожарникари со шест противпожарни возила на скопската Противпожарна бригада. Интервенцијата траела повеќе од три часа, информираат од Центарот за управување со кризи.
Засега нема официјални информации за причината за избувнувањето на пожарот. Од МВР велат дека на местото ќе биде извршен увид, по што треба да се утврдат околностите под кои настанал пожарот и да се преземат соодветни мерки за расчистување на случајот. Големиот пожар предизвикал значителна материјална штета, а обемот на огнената стихија е видлив и од снимките објавени во текот на ноќта.
Истрагата треба да покаже како избувнал пожарот и колкава е вкупната причинета материјална штета.
ИЗДВОЕНИ
Не се од Буџетот, од Државна лотарија се – 5 и пол милиони евра за „Силно светнал ден“
„Ниту еден обвинет не смее да биде спасен од бавноста на системот“, порачаа родителите
Андреа Серафимовски за весникот ВЕЧЕР: Македонците повеќе инвестираат во станови отколку во банки, но многу од нив се празни
Симптомите на западнонилската треска може да траат и до два месеца
