Претставата „Мрки, нисам ти испричао“ на Марко Јанкетиќ во Скопје

Емотивната претстава „Мрки, нисам ти испричао“ на познатиот српски актер Марко Јанкетиќ, по големата турнеја низ регионот, на 25 ноември (20:00 часот), ќе гостува и во Скопје.

Посветена на неговиот татко, легендарниот српски актер Миша Јанкетиќ, оваа мултимедијална претстава низ искрена приказна отвора простор за сеќавањата, семејните односи, љубовта, загубата и за зборовите што остануваат неискажани. „Мрки, нисам ти испричао“ токму преку лична приказна зборува за сите овие универзални теми, како и за потребата да се кажат нештата додека сè уште имаме кому да му ги кажеме.

Мрки, пак, е зборот со кој Марко и неговиот татко, Миша Јанкетиќ, се викале еден со друг. Збор што за нив значел блискост, доверба и љубов.

Марко Јанкетиќ во претставата не игра лик, тој, всушност, ја раскажува својата лична приказна. Тој воедно е и автор на претставата, а мултимедијалниот пристап и музиката во живо ги надополнуваат актерската игра и визуелниот израз.

Претставата режирана од Анѓелка Стевиќ-Жугиќ истовремено ги спојува хуморот, музиката во живо и силните емоции, создавајќи атмосфера во која границата меѓу личната исповед и театарската приказна исчезнува.

Станува збор за искрена сценска приказна, која им нуди на гледачите доживување што истовремено трогнува и насмевнува.

Претставата досега има позитивни реакции од публиката и од медиумите во Србија и во Црна Гора.