„Мозокот“ на нападите од 11 септември, Калид Шеик Мохамед е уапсен во 2003 година – судењето не е ниту на повидок

Повеќе од 20 години по притворањето на Калид Шеик Мохамед – обвинет како главен организатор на нападите од 11 септември – неговото судење пред американски воен трибунал сè уште е неизвесно. Американски воен судија неодамна го одреди 5 јуни 2028 година како датум за почеток на судењето на Мохамед и тројца сообвинети, но некои правни експерти сметаат дека постапката можеби никогаш нема да заврши. Како главни причини за тоа ги наведуваат сложените правни прашања кои произлегуваат од неговото апсење во Пакистан во 2003 година и последователното мачење додека бил во американски притвор.

Кон крајот на август, судијата пресуди дека обвинителството не може да ја користи наводната исповед што Мохамед ја дал пред ФБИ во 2007 година. Судот утврди дека тие изјави се компромитирани бидејќи тој бил подложен на „засилени техники на испрашување“, вклучително и „вотербординг“ (симулирано давење). Иако ова претставуваше удар за обвинителството, американската влада одлучи да не поднесе жалба за да не го одложува дополнително потенцијалното судење.

Мохамед се наоѓа во притворниот центар во Гвантанамо од 5 септември 2006 година, по повеќе од три години поминати во тајни затвори во други земји. Во извештај на американскиот Сенат претходно детално беше опишано неговото долготрајно мачење додека бил во притвор на ЦИА, вклучително и 183 сесии на „вотербординг“.

Обидот да му се суди пред цивилен суд во Њујорк пропадна уште во 2009 година поради противење од дел од јавноста и политичарите, врз основа на безбедносни причини. Подоцнежниот договор за признавање вина, кој би му донел доживотен затвор наместо можна смртна казна, почна да пропаѓа набрзо по објавувањето во 2024 година, а конечно пропадна минатата година.

Џошуа Дрател, адвокат вклучен во обезбедувањето на неговата правна одбрана, изјави: „Сè е контаминирано од политиката и од недостатокот на одговорност за мачењето“.

Тери Страда, чиј сопруг загина во Светскиот трговски центар, рече дека семејствата на жртвите сè уште сакаат процесот да заврши: „Навистина сакаме ова конечно да заврши. Сакаме да се задоволи правдата. Тоа е исто толку важно колку што беше и пред 25 години“.