Москва ја извести СЗО за епидемиолошката состојба во Иркутската област по смртта на една работничка

Дмитриј Песков, портпаролот на рускиот претседател Владимир Путин, денеска изјави дека Светската здравствена организација (СЗО) е информирана за епидемиолошката состојба во Иркутската област, каде што минатата недела почина работничка во лабораторија од болест за која медиумите известија дека е пневмонична чума.

Одговарајќи на новинарски прашања за состојбата во регионот, Песков ја истакна потребата да се потпреме на изјавите и информациите од Руската федерална служба за надзор на заштитата на правата на потрошувачите и благосостојбата на луѓето („Роспотребнадзор“), која, како што додаде, во вторникот објавила дополнителни и подетални информации за ситуацијата на својата веб-страница, пренесува „РИА Новости“.

„Светската здравствена организација беше дополнително информирана, во согласност со воспоставената практика“, рече Песков.

Тој додаде дека повеќето медиумски извештаи за ситуацијата во регионот Иркутск содржат лажни информации и дека вниманието треба да се насочи кон податоците од руското тело за заштита на правата на потрошувачите, „Роспотребнадзор“.

Светската здравствена организација (СЗО) претходно побара повеќе информации од Русија во врска со смртта на работник во институт за истражување на чума во Сибир, нагласувајќи дека транспарентноста е клучна за добивање јасна слика за потенцијалните здравствени ризици.

Руските власти соопштија дека 28-годишна лабораториска работничка починала во петокот, 2 октомври, од пневмонија со непознато потекло. Според медиумските извештаи, околу 200 лица се ставени во карантин во врска со овој случај.