Модерни спортски терени во населбата „Стрелиште“

По повеќе од две децении, жителите на населбата „Стрелиште“ во Битола ќе добијат нови и современи спортски терени.

Од Општина Битола велат дека се работи за значаен инфраструктурен проект за реконструкција и модернизација на постојните игралишта.

Во рамките на проектот ќе биде изградено ракометно игралиште со димензии 40 на 20 метри, како и кошаркарско игралиште со димензии 30 на 15 метри. Предвидена е и мини атлетска патека во рамките на фудбалското игралиште, како и пристапна патека до спортските содржини изработена од бекатон плочки.

Проектот опфаќа целосно отстранување на постојниот асфалт и поставување нова асфалтна подлога со еластичен тартан, што ќе овозможи побезбедни и поквалитетни услови за спорт и рекреација.

Дополнително, околу спортските терени ќе биде поставена нова метална транспарентна ограда со висина од четири метри, со што ќе се подобри безбедноста и функционалноста на комплексот.

Вкупната вредност на проектот изнесува 26.470.435 денари. Средствата се обезбедени од Министерството за спорт преку вториот владин повик, на кој Општина Битола успешно аплицираше.

– Со реализацијата на овој проект, населбата „Стрелиште“ ќе добие современ спортско-рекреативен простор кој ќе биде на располагање на младите, спортистите и на сите граѓани – нагласија од Општина Битола.