Маж ја добивал пензијата на својата почината сопруга 20 години

Австрискиот министер за внатрешни работи, Герхард Карнер, одржа работен состанок на кој беа презентирани резултатите од борбата против социјалните измами, чиј број речиси четирикратно се зголеми од 2016 година.

На состанокот присуствуваа и Франц Руф, генерален директор за јавна безбедност, Андреас Холцер, директор на „Bundeskriminalamt“, како и претставници на неколку министерства и институции.

Измамата траела две децении

Еден од најдрастичните случаи се однесува на граѓанин на Босна и Херцеговина кој со години ја добивал пензијата на својата почината сопруга, користејќи фалсификувани потврди дека таа е сè уште жива.

Случајот го откри работната група SOLBE (за борба против социјалните измами). Мажот, кој живеел во Австрија од 1996 година, на хартија го „продолжил“ животот на својата сопруга која починала во 2006 година и продолжил да ја зема нејзината пензија секој месец.

На сметката на починатиот паѓале околу 1.500 евра месечно, а вкупната штета за државата се проценува на околу 270.000 евра.

Откриена дури во 2026 година

Измамата била откриена дури во 2026 година, кога PVA (Агенција за пензиско осигурување) поднела пријава поради сомневање. Полицијата потоа започнала истрага и ја блокирала сметката.

Блокадата успеала да врати околу 57.000 евра, но поголемиот дел од парите бил изгубен засекогаш.

Истрагата покажала дека мажот ги фалсификувал таканаречените потврди за живот, ја користел здравствената картичка на починатата сопруга и успеал да ги измами институциите.

Осомничениот починал

Сепак, случајот нема да добие судски епилог – осомничениот оттогаш починал, па затоа нема да биде изведен пред суд.

Се повеќе социјални измами

Според податоците од австриското Министерство за внатрешни работи, бројот на вакви измами постојано се зголемува. Сепак, од формирањето на специјалната единица СОЛБЕ, благодарение на соработката на институциите, откриени се штети од околу 158 милиони евра.

Овој случај дополнително укажува на обемот на проблемот и потребата од построга контрола во системот за социјални бенефиции.