Францускиот претседател Емануел Макрон повика на „целосна мобилизација“ на владата како одговор на растот на цените на горивото и ризиците поврзани со снабдувањето. За време на состанокот на Советот на министри, Макрон ѝ наложи на владата целосно да се зафати со прашањата за цените и достапноста на горивото. Портпаролката на владата, Мод Брежон, ја потврди веста.
„Целта на претседателот за наредните денови и недели е да се обезбеди снабдување и да се гарантираат потребните количини, особено од други земји“, изјави Брежон пред новинарите.
Таа исто така најави напори за постигнување „поголема флексибилност на регулативите на европско ниво, со цел донекаде да се олесни системот за рафинериите“. „Целта е да се намалат цените колку што е можно повеќе или барем да се контролира нивниот раст“, објасни портпаролката.
Според неа, околу 10 отсто од бензинските пумпи имаат тешкотии со снабдувањето со „барем еден вид гориво“, а повеќето од нив припаѓаат на мрежата на „TotalEnergies“. „Сакам да ги смирам сите: синџирите на снабдување немаат некакви невообичаени тешкотии во споредба со вообичаената состојба. Од друга страна, интензивно работиме на меѓународните набавки“, рече таа, пренесе „Индекс“.
Остриот раст на цените на горивото поттикна повици за протести што потсетуваат на движењето „Жолти елеци“. Истовремено, рибарите на Медитеранот ги блокираат складиштата за нафта.
На прашањето за ова незадоволство, Мод Брежон одговори дека владата „не исклучува нови мерки бидејќи ситуацијата станува сè потешка, особено во последните недели“. Сепак, таа не сакаше да прецизира рокови за тие потенцијални мерки и додаде дека владата многу внимателно го разгледува целиот проблем.
