Македонските аеродроми бележат најбрз раст на бројот на патници во регионот, покажуваат податоците на операторот на двата меѓународни аеродроми и на Министерството за транспорт, изјави премиерот Христијан Мицкоски. Според него, позитивните показатели се потврдени и во анализите на Светската банка, каде што се нотира напредок и во туристичкиот сектор.
– Она што охрабрува се податоците што ги пренесе операторот на двата меѓународни аеродроми, а истото го потврди и Министерството за транспорт: двата аеродроми се најбрзорастечки во регионот по бројот на патници. И Светската банка, во делот за туризмот, го потенцира тоа. Тоа е добра вест за граѓаните и за сите што ѝ мислат добро на државата – изјави Мицкоски.
Тој посочи дека во првите седум месеци од годинава бројот на летови и на патници е зголемен за 20, 30, па дури и за 40 проценти во споредба со истиот период лани.
– Тоа е навистина значаен резултат и нè мотивира да продолжиме во таа насока. Туризмот е еден од приоритетите на Владата, а тоа се гледа и преку зголемениот број посетители, особено во Охрид, но и низ целата држава – рече премиерот.
