Македонија стиска палци за Никола Ѓуретановиќ – ќе се бори со европската елита!

Француската престолнина, Париз, овие денови е центарот на европското пливање, каде што најдобрите пливачи од Стариот Континент ги одмеруваат силите на Европското првенство во водни спортови. Натпреварите во пливање почнаа вчера, а Македонија ќе има само еден претставник на шампионатот. Тоа е 17-годишниот олимпиец Никола Ѓуретановиќ, кој ќе ги брани боите на нашата земја во две дисциплини – 200 и 400 метри слободен стил. Првиот настап ќе го има в четврток, 13 август, за кога (во 9:30 часот) се закажани квалификациите на 200 метри слободно. Три дена подоцна, в недела на 16 август, во истиот термин, ќе стартуваат и квалификациите на 400 метри слободен стил.

Пред македонскиот пливач е голем предизвик, со оглед на тоа што ќе се натпреварува во конкуренција на најдобрите европски пливачи. Но, ова е уште една можност да стекне драгоцено искуство на големата сцена и да покаже дека македонското пливање има млад талент на кој може да се смета во иднина.

И додека европските пливачки сили вложуваат огромни средства во подготовките, инфраструктурата и во развојот на своите спортисти, македонските пливачи со години се соочуваат со сосема поинаква реалност. Токму затоа секој настап на големите натпреварувања има дополнителна тежина.

Од Ѓуретановиќ не треба да се очекува нешто невозможно, туку максимален ангажман и борба за секоја стотинка. А најголемата желба е настапите во Париз да му донесат нови лични достигнувања и подобрување на неговите најдобри времиња.

Македонија ќе има само еден пливач во Париз, но Никола Ѓуретановиќ ќе има можност уште еднаш да покаже дека и покрај сите (не)услови, македонското пливање сè уште има свои светли точки.