Лула го обвинува Вашингтон за заговор, Болсонаро е веќе во Мајами

Бразилскиот сенатор Флавио Болсонаро и неговото семејство пристигнаа во Мајами во средата, откако американската влада им издаде влезни визи – и тоа откако тој одби да ја испочитува наредбата на бразилскиот Врховен суд за предавање на нивните пасоши.

Болсонаро – кој на претседателските избори во неделата беше поразен од актуелниот претседател, левичарот Луиз Инасио Лула да Силва – тајно го напушти Бразил по издавањето судски налог поврзан со истрага за перење пари. Тој негира каква било вмешаност во незаконски дејствија.

Снимки од „Телевизија Ројтерс “ прикажуваат како Болсонаро, неговата сопруга и неговите две ќерки излегуваат од авион „Галфстрим Г400“ на аеродромот „Мајами-Опа Лока“.

Нивното патување кон Соединетите Држави привлече внимание во целиот регион. Според аргентинските миграциски власти, тие влегле во северна Аргентина доцна во вторникот вечерта, по што со приватен авион заминале за еквадорскиот град Гвајакил. Оттаму, продолжиле кон Мајами.

Кабинетот на аргентинскиот претседател, министерствата на еквадорската влада и компанијата „Баирес Флај“  – операторот на приватниот авион – не одговорија на барањата за коментар.

Нов јаз меѓу Бразил и САД

Заминувањето на Болсонаро се заканува дополнително да го продлабочи јазот меѓу двете најнаселени нации на американскиот континент.

Лула го обвини Вашингтон за договарање со семејството Болсонаро со цел да им помогне да се вратат на власт. Пред изборите во неделата, „Ројтерс“ објави информации за план на американскиот Стејт департмент чија цел е враќање на семејството Болсонаро на власт. Во средата, Трамп им изјави на новинарите дека го поддржува доаѓањето на Болсонаро во САД, откако Стејт департментот објави дека ќе им бидат издадени влезни визи.

Трамп претходно тврдеше дека таткото на Флавио, поранешниот претседател Жаир Болсонаро, е жртва на судски прогон во Бразил.

Жаир Болсонаро, исто така, замина за САД откако одби да го признае поразот од Лула во 2022 година, за време на претседателскиот мандат на Џо Бајден. Тој на крајот се врати во Бразил, но подоцна беше осуден на 27 години затвор за планирање државен удар, по инцидентот во кој неговите поддржувачи упаднаа во владините згради во Бразилија.

Се очекуваше Флавио Болсонаро да победи на изборите во неделата, но наместо тоа, доживеа неочекуван пораз.

Болсонаро – кој ќе го изгуби својот парламентарен имунитет од кривично гонење кога во февруари ќе му заврши мандатот во Сенатот – во понеделникот, откако доби налог да ги предаде своите пасоши, изјави дека нема намера да бега.

„Никогаш не сум размислувал да ја напуштам земјата“, рече тој. „Ќе ги предадам пасошите и ќе се бранам од оваа фарса, која претставува јасен обид за заплашување.“