Британскиот бизнисмен и милионер Овејн Дејвис (55), директор на инженерска компанија, се наоѓал во авионот „Цирус SR22T“ (Cirrus SR22T) што се урна во близина на градот Лојкербад во швајцарските Алпи, пренесува „Дејли мејл“.
Во несреќата, која се случи во вторникот, загинаа уште две лица, меѓу кои и еден друг британски државјанин.
Компанијата што тој ја предводеше, „Амкану“ (Amcanu), го опиша овој татко на две деца како „незапирлива сила“ и „многу добар пријател“.
Во 2000 година, Дејвис го презеде раководењето со компанијата – со седиште во Бари Порт, Јужен Велс – која била основана во 1975 година од неговиот татко, Спенсер Дејвис (носител на орденот OBE).
Компанијата му оддаде почит на својот директор преку соопштение. „Тој беше познато лице во фабриката, незапирлива сила, ментор и – за многумина кои поминаа значителен дел од својот работен век во ’Амкан‘ – многу добар пријател. Пред сè, тој беше сопруг, татко и дедо. Постоеше и друга страна на Овејн за која не сите знаеја: тој сакаше да лета. Овејн беше искусен пилот, а воздухопловството беше негова вистинска страст – од технички и социјален аспект, како и едноставно поради слободата и уживањето што му ги носеше“, се вели во соопштението, во кое се додава:
„Имаше широк круг пријатели во воздухопловната заедница и леташе со својот хеликоптер секогаш кога ќе се укажеше можност. Никогаш не правеше голема работа околу тоа; всушност, многумина што го познаваа професионално можеби никогаш не сфатиле колку воздухопловството му значело. Во моментот на несреќата, Овејн патувал како патник заедно со двајца од неговите најблиски пријатели. Околностите на неговата смрт се поразителни, но сепак, летањето беше нешто што му носеше огромна среќа на Овејн во текот на целиот негов живот.“
Последните зборови од соопштението беа особено трогателни.
„Овејн беше сакан. Беше почитуван. Влеваше длабока почит. Беше неверојатно грижлив. Беше сопруг, татко, дедо, син, ментор, лидер и пријател… И ќе недостига повеќе отколку што зборовите можат да опишат.“ Амкан додаде дека Дејвис бил „горд Велшанец и говорник на велшкиот јазик“ и дека од 2017 година служел како член на управниот одбор на хуманитарната организација „Wales Air Ambulance“.
Детали за несреќата
Надлежните соопштија дека aвионот полетал од аеродромот Сион во долината на Рона и се урнало на планинска падина приближно 10 минути подоцна. На местото на несреќата пристигнале пожарникари, полиција и хеликоптерски спасувачки тимови, но причината за падот сè уште не е позната.
Истрагата ја води Швајцарскиот одбор за безбедност во транспортот, а паралелно со тоа истрага спроведуваат и кантоналната полиција на Вале и јавното обвинителство.
Британското Министерство за надворешни работи потврди дека „дава поддршка на семејствата на двајца британски државјани кои загинаа во Швајцарија“.
