Романскиот претседател Никушор Дан го именуваше дипломатот и поранешен новинар Лука Никулеску за мандатар за состав на новата влада. Ова е веќе четврти обид за пронаоѓање премиер во текот на петмесечната политичка криза, откако претходните тројца кандидати не успеаја да формираат стабилна влада.
Кој е Лука Никулеску?
Никулеску (55) е државен секретар во Министерството за надворешни работи, а од 2022 година го координира процесот на пристапување на Романија кон Организацијата за економска соработка и развој (ОЕЦД). Претходно бил амбасадор во Франција, Андора и Монако, а од 1992 до 2016 година работел како новинар.
Дан изјави дека Никулеску е „дипломат – односно човек чија работа е да ги усогласува ставовите“ – и оцени дека токму тој има најголеми шанси да обезбеди парламентарно мнозинство, нагласувајќи дека за Романија е „од витално значење и итно“ конечно да добие влада.
Politico наведува дека Никулеску најавил разговори со парламентарните партии и порачал дека негова примарна задача е создавање мнозинство. Тој вети сериозен однос кон јавните финансии, економска предвидливост, забрзување на инвестициите и реформите, додека лидерот на Социјалдемократската партија (ПСД), Сорин Гриндеану, оцени дека новото именување повторно „ѝ пркоси на парламентарната аритметика“.
Политичката блокада трае уште од мај, кога владата на Илија Боложан беше соборена со гласање недоверба. По минатонеделното отфрлање на кабинетот предложен од третиот мандатар, Зигфрид Мурешан, дополнително порасна можноста за предвремени избори, кои Гриндеану сега отворено ги споменува доколку Никулеску продолжи со политиката на штедење на Боложан.
