Министерството за култура и туризам објави конкурс за финансирање превод и објавување дела од македонски автори на странски јазици за 2026/2027 година. Конкурсот содржи јасно дефиниран буџет, јасно утврдени услови, мерила и критериуми, кои ќе обезбедат потранспарентен модел на поддршка, рамноправност и одговорно управување со буџетските средства.
– Целта на конкурсот е да се поттикне меѓународната афирмација на македонската книжевност, да се зголеми достапноста на домашните автори за странската читателска публика и да се унапреди културната соработка со меѓународните издавачи. Право на учество имаат исклучиво странски издавачи чија дејност опфаќа издавање книги. Со конкурсот ќе се поддржуваат преводи и објавување уметничка проза, поезија, драма, есеи, литература за деца, како и антологии и други книжевни избори наменети за поширок круг читатели – посочуваат од Министерството за култура.
Инаку, Министерството ќе учествува во финансирањето на трошоците за превод на избраните дела, со највисок износ на поддршка до 300.000 денари за проект, додека трошоците за печатење, промоција и за дистрибуција не се предмет на финансирање.
Конкурсот е отворен во текот на целата година, а стручната комисија ќе ги разгледува пристигнатите пријави во два рока: во октомври 2026 година и во март 2027 година. Пријавувањето со придружната документација се поднесува во ПДФ-формат, на електронската адреса: [email protected].
– Конкурсот за финансирање преводи на репрезентативни и квалитетни дела од македонската книжевност на странски јазици, воспоставен во 2013 година, претставува значаен инструмент за меѓународна промоција на македонската литература и за афирмација на домашните автори во странство. Со оваа мерка, се поддржува македонската книжевност на начин што ќе обезбеди законитост, отчетност и вистинска поддршка за дела и за проекти што имаат реална културна вредност и значење за промоција на македонската литература во странство – додаваат од Министерството.
ИЗДВОЕНИ
Нова поддршка за Македонците во Албанија: ФУЕН ја усвои резолуцијата на „Илинден“-Тирана
Обвинение за фалсификувани возачки дозволи: Вработена во МВР впишувала Ц и Д категории
„На Струга дуќан да имам“ се слуша во Холивуд, во филм со Метју Меконахи и Курт Расел/ВИДЕО
Мицкоски: Не се инаетиме со Бугарија, не сме тврдоглави, бараме решенија со предвидлив крај
