Германскиот генерал Бројер е избран за нов шеф на Воениот комитет на НАТО

Германскиот генерал Карстен Бројер е избран за нов шеф на Воениот комитет на НАТО – највисокиот воен орган на Алијансата и клучно советодавно тело за нејзините политички лидери.

Според соопштението, Бројер ќе ја преземе функцијата во летото 2027 година, со мандат од три години.

Актуелниот претседавач на телото, адмирал Џузепе Каво Драгоне, пофално се изрази за својот иден наследник.

„Вашата оперативна проценка, длабокото познавање на Алијансата и раководењето со германските вооружени сили ќе бидат од голема корист за НАТО. Началниците на одбраната ја вложија својата доверба во Вас во време што е предизвикувачко за евроатлантската безбедност“, рече тој.

Комитетот е највисокото воено тело на НАТО, а неговиот претседавач служи како главен воен советник на политичкиот лидер на НАТО, генералниот секретар Марк Руте.

Бројер ја презема функцијата во период на превирања во рамките на Алијансата. Американскиот претседател Доналд Трамп побара европските нации да ја преземат одговорноста за одбраната на континентот, по децениското американско лидерство.

Воениот комитет на НАТО одржува состаноци на ниво на началници на одбраната двапати годишно во седиштето во Брисел и организира годишна конференција во соработка со земјата-домаќин. Следниот пленарен состанок е закажан за јануари 2027 година во Брисел, пренесе „Бета“.