Комисијата за општествени дејности при Советот на Општина Струмица распишува Конкурс за доделување на Годишна награда и награда за животно дело на општина Струмица „Св. Петнаесет тивериополски свештеномаченици”.
Годишната награда се доделува како признание на Општина Струмица на правни и физички лица од Општината, Република Македонија и други држави како и на меѓународни организации и асоцијации и нивни претставници за посебни остварувања во стопанството, науката, уметноста, културата, воспитувањето и образованието, здравствената заштита, социјалната заштита, спортот, техничката култура, заштитата и унапредувањето на животната средина и природата, како и сите други сегменти од животот, што дале посебен придонес за развој и афирмација на општина Струмица во Македонија и пошироко.
Годишната награда се доделува за остварувања реализирани во период од една година, сметано од завршувањето на огласот и за остварувања во период подолг од десет години како награда за животно дело.
Право за предлагање кандидати за наградата имаат: научни, стручни, стопански и други организации и заедници и граѓани поединци.
Конкурсот трае заклучно до 26 ноември 2026 година.
