Новата сезона во НБА е пред самиот почеток, а Шеј Гилџес-Александер веќе испрати силна порака до своите ривали. Ѕвездата на Оклахома не се двоуми да го каже она што многумина го мислат за неговите настапи – се смета себеси за најдобар кошаркар во најсилната лига во светот.
Канаѓанецот, кој е актуелен двократен МВП, во интервју за магазинот „Тајм“ отворено зборуваше за својата позиција меѓу најголемите ѕвезди во НБА. Според него, неговите игри, ефикасноста и бројните победи се доволна потврда за неговото тврдење.
- Мислам дека сум најдобриот играч во НБА. Сметам дека она што го прикажувам на секој натпревар е резултат на најдобар играч во НБА. Мислам дека ефикасноста со која го правам тоа е на ниво на најдобар играч во НБА, изјави Гилџес-Александер.
Минатата сезона тој одигра 68 натпревари, со просек од 31,1 поен, 4,3 скока и 6,6 асистенции. Имаше и извонредни проценти на шут – 55,3 отсто од поле, 38,6 отсто за три поени и 87,9 отсто од линијата за слободни фрлања. Таквите бројки, заедно со одличните резултати на Оклахома, му ја донесоа втората последователна награда за најкорисен играч. Сепак, неговата самоуверена изјава сигурно ќе привлече внимание и ќе им даде дополнителен мотив на конкурентите во борбата за тронот.
Меѓу нив е и Никола Јокиќ, кој повторно се најде во центарот на дебатите околу МВП-признанието. Српскиот центар минатата сезона бележеше просек од 27,7 поени, 12,9 скока и 10,7 асистенции на 65 натпревари, но тоа не беше доволно за нова награда.
Сега останува да се види дали Канаѓанецот ќе ја потврди својата самодоверба и на теренот во сезоната 2026/27. Со ваква изјава, тој дополнително ги подгрева очекувањата, а ривалите добиваат јасна порака дека Оклахома и нејзиниот лидер повторно ќе атакуваат на највисоките цели.
