Јасна порака од Кремљ: Ако Зеленски сака средба со Путин, нека дојде во Москва

Доколку украинскиот претседател Володимир Зеленски навистина сака да се сретне со рускиот претседател Владимир Путин, може да дојде во Москва – поканата за него останува отворена, изјави портпаролот на Кремљ, Дмитриј Песков.

Реагирајќи на изјавата на Зеленски дека е подготвен да се сретне со Путин на претстојниот самит на групата Г20 во Соединетите Американски Држави, Песков рече дека Путин и претходно го поканувал Зеленски на средба во Москва и додаде дека сè уште не е познато дали Путин ќе патува на самитот на Г20, јавува Спутник.

„Верувам дека сите се поканети, освен, за жал, Јужна Африка. Но за тоа дури и не се разговараше. Работата се одвива на експертско ниво. Нашите експерти исто така постојано работат на документите за претстојниот самит. Со други зборови, сè тече во вообичаениот тек. Што се однесува до можноста Путин да отпатува, за тоа прашање дури и не сме разговарале – рече Песков и наведе дека Путин и Трамп неодамна разговарале телефонски, и тоа „срдечно и конструктивно“.

Порано вчера, Зеленски рече дека е подготвен да се сретне со претседателот на Русија, Владимир Путин, на самитот на Г20 во Мајами доколку биде поканет.

„Да, секако. Мораме да дојдеме. Мораме да се сретнеме, да разговараме и да донесеме одлука“ – рече Зеленски.

Според зборовите на украинскиот лидер, она што ќе му го каже на рускиот претседател нема да биде најважно. Само резултатот ќе биде важен – нагласи Зеленски.

Самитот на Г20 ќе се одржи на 14 и 15 декември во Мајами, САД. Според официјалната веб-страница на самитот, Украина сè уште не е меѓу земјите кои не се членки на Г20, а кои се поканети да учествуваат.

Помошникот на рускиот претседател за меѓународни работи, Јуриј Ушаков, изјави порано денеска дека учеството на Владимир Путин на самитот на Г20 во Соединетите Држави сè уште не е разгледано.

Ушаков наведе дека Русија работи на експертско ниво на документите за претстојниот самит.