Јанша потпиша коалициски договор за првата десничарска влада во Словенија: Ќе ја извлечеме земјата од мочуриштето“

Словенечката демократска партија (СДС), Демократите и алијансата што ја сочинува Нова Словенија (НСи), Народната партија (СЛС) и Фокус денес потпишаа коалициски договор што ќе биде основа за формирање на првата десничарска влада во Словенија.

Партиите ветија дека ќе работат на развојот и просперитетот на Словенија, борбата против корупцијата, намалувањето на бирократијата и децентрализацијата на државата, објавува СТА.

Коалицискиот договор беше потпишан зад затворени врати во парламентот, еден ден пред лидерот на СДС, Јанез Јанша, да биде назначен за премиер во Националното собрание.

Новата коалиција има вкупно 43 места во парламентот со 90 пратеници, додека Јанша ја ужива и поддршката на партијата „Истина“, суверенистичка партија која произлезе од антиваксерското движење за време на пандемијата Ковид.

Партијата има пет пратеници и ќе поддржи малцинска влада од опозицијата. Се очекува и поддршка од пратеници од италијанското и унгарското малцинство.

Јанша досега беше премиер три пати, но неговите претходни влади секогаш вклучуваа партија од центарот или левица од центарот.

Во видео порака објавена на социјалните мрежи, Јанша рече дека коалициската програма ќе ја извлече Словенија од „заостанатост, бирократска мочуришна состојба и прекумерна централизација“.

„Нема да биде лесно, ќе има многу пречки, но имаме доволно знаење и храброст да ги надминеме“, рече Јанша, повикувајќи ги „сите луѓе со добра волја“ да ја поддржат новата влада, пренесе „Танјуг“.

Приоритетите на коалицијата вклучуваат развој, повисок животен стандард, решителна борба против корупцијата и организираниот криминал, помалку бирократија и децентрализација за порамномерен регионален развој.

Лидерот на демократите, Анже Логар, рече дека договорот носи „нов концепт за развој за Словенија“, со цел олеснување на товарот врз економијата и зајакнување на борбата против корупцијата.

Документот, исто така, предвидува формирање специјализирано обвинителство за борба против корупцијата и организираниот криминал, наречено СКОК.

Претставниците на коалицијата изјавија дека договорот вклучува специфични програми во 14 области, додека лидерот на НСи Јернеј Вртовец рече дека новата влада ќе се залага за „успешна Словенија, поголем просперитет, помалку бирократија, децентрализација и крај на криминалот и корупцијата“, пренесе „Телеграф“.