Ја продаде опремата за да го спаси синот, сега е херој на Светското првенство!

Орландо Гил прекуноќ стана еден од најголемите херои на Светското првенство откако го водеше Парагвај до осминафиналето со феноменалните одбрани против Германија. Искусниот голман беше нерешлива енигма за Германците во текот на 120. минути игра, а потоа одбрани два удари во пенал- рулетот и стана апсолутен херој на една од најголемите сензации на првенството досега.

Денес, неговото име е меѓу најспоменуваните во светскиот фудбал, но патот до славата му бил далеку од едноставен.

Гил е роден во 2000 година, а денес брани за аргентинскиот Сан Лоренцо, додека за репрезентацијата на Парагвај дебитираше пред помалку од една година. Иако неодамна доби шанса во националниот тим, многу брзо стана прв избор меѓу стативите и еден од најважните играчи во репрезентацијата.

Неговиот почеток на Светското првенство не беше идеален бидејќи прими четири гола против САД, оставајќи многумина да се сомневаат дека може да го издржи притисокот на најголемата фудбалска сцена.

Сепак, следуваше целосен пресврт. Против Турција и Австралија, тој беше меѓу најзаслужните за добрите резултати на својата репрезентација, а врвот го достигна во спектаклот против Германија.

Во текот на 120. минути од натпреварот, тој имаше пет одлични одбрани, а потоа, во пенал-рулетот, одбрани два удари и практично сам го одведе Парагвај во осминафиналето.

Сепак, она што ја прави неговата приказна особена не е само она што го прави на теренот.

Имено, тој воопшто не бил голман во помладите категории. Ја почнал својата кариера како напаѓач и играч од средниот ред, а дури подоцна одлучил да застане меѓу стативите, што се покажало како потег што му го променил животот.

Професионалната кариера не му била лесна. Тој е член на Сан Лоренцо од 2023 година, но поради сериозните финансиски проблеми на клубот, тој и неговите соиграчи останале без плата со месеци. Сепак, тој го доживеал најтешкиот период надвор од фудбалскиот терен, кога се соочил неговиот новороден син со сериозни здравствени проблеми.

За да собере пари за лекување, тој бил принуден да ја продаде својата спортска опрема, вклучувајќи ги и копачките, клупската опрема, па дури и дресот што го носеше на Јужноамериканското првенство до 20 години.

Трогателната приказна ѝ ја откри на јавноста неговата сопруга, Мелиса.

– Кога се роди нашиот син, немавме ништо. Орландо ги продаде својата стара клупска опрема, копачките, дури и дресот од Јужноамериканското првенство за играчи до 20 години. Лаути се бореше за својот живот, но неговиот татко секогаш беше тука. Никогаш не било лесно и никогаш нема да биде, но со љубов и жртва – сè е можно. Се надевам дека светот ќе открие какво големо срце има – напиша Мелиса.

Денес, откако стана херој на Парагвај и еден од симболите на ова Светско првенство, Орландо Гил повеќе не е само голманот што ја исфрли Германија.

Неговите игри го привлекоа вниманието на бројни европски клубови и нема сомнение дека трансферот во една од најсилните европски лиги би можел да претставува негова награда за годините жртва, борба и искушенија во животот што успеа да ги надмине.