Израел погоди хотел во Бејрут: „Тука нема терористи, само семејства“

Израелските одбранбени сили (ИДФ) ги повикаа цивилите што живеат јужно од реката Литани во Либан веднаш да се упатат северно од реката, пред „воената акција“ против Хезболах во областа.

„За ваша сопствена безбедност, мора веднаш да ги напуштите своите домови“, предупредува ИДФ.

Во соопштението се вели дека секој што е во близина на „оперативци на Хезболах, нивните објекти или нивното оружје го става својот живот во опасност“.

„Веќе не се чувствувам безбедно“, вели сопственикот на хотелот погоден од израелскиот напад во Хазмие, на периферијата на либанската престолнина Бејрут.

Хотелот Комфорт претрпе сериозни штети на првиот и вториот кат, а сведоци велат дека рецепционерот бил сериозно повреден и однесен во болница, пренесува Би-Би-Си.

Расчистувањето беше во тек утрово, додека локалното население го гледаше местото на настанот во шок.

„Нè разбуди експлозија и прашина“, вели еден човек што престојувал во хотелот и додава:

„Не знаеме ништо. Не знаеме што се случило… Оваа област е инаку безбедна“.

Магај Чебли, која е сопственик на хотелот заедно со својот сопруг, вели дека добила повик околу 4 часот наутро дека хотелот бил погоден од израелски напад.

Таа наведува дека меѓу гостите на хотелот имало раселени лица и дека се обиделе да прифатат само семејства.

„Жалам што не бевте тука порано и не видовте како тие семејства излегоа со своите пелени и млеко. Немаме терористи тука. Ги мразиме“, вели таа.

Би-Би-Си побара коментар од израелската војска за нападот и која била целта. Магај вели дека повеќе не се чувствува безбедно никаде во Либан, но дека нема да ја напушти земјата.

„Кому да му верувам? Дали да му верувам на Хезболах или на Израел? Не му верувам на никого“, вели таа.