Израел го забрани одржувањето на мисата за Цветници во Црквата на Светиот гроб во Ерусалим – се огласи Макрон осудувајќи ја одлуката

Францускиот претседател Емануел Макрон ја осуди одлуката на Израел да им забрани на двајца високи католички функционери во Светата Земја да влезат во црквата на Светиот Гроб во Ерусалим наутро на Цветници.

„Целосно го поддржувам латинскиот патријарх на Ерусалим и христијаните во Светата Земја, на кои им беше спречено да ја одржат мисата на Цветници во црквата на Светиот Гроб“, рече Макрон на платформата „Икс“.

„Ја осудувам оваа одлука од страна на израелската полиција, што дополнително придонесува за загрижувачкото зголемување на прекршувањата на статусот кво на светите места во Ерусалим. Слободното практикување на религијата во Ерусалим мора да биде гарантирано за сите религии“, додаде тој.

Од почетокот на американско-израелската војна против Иран на 28 февруари, израелските власти го забранија пристапот до Стариот град од безбедносни причини за сите освен за жителите и сопствениците на продавници.

Ограничувањата важат за сите свети места, вклучувајќи го Западниот ѕид, џамијата Ал-Акса и Црквата на Светиот Гроб, кои се затворени од 6 март. Собирите во Ерусалим се ограничени на 50 лица, под услов да можат навреме да стигнат до засолниште.

Полицијата соопшти дека Стариот град и светите места во Ерусалим „претставуваат комплексна област која не дозволува пристап за големи возила за итни случаи и спасување, што значително ги комплицира интервенциите и претставува реален ризик за човечкиот живот во случај на масовни жртви“.

Полицијата, исто така, соопшти дека католичките службеници биле однапред информирани дека во моментов не им е дозволено да влезат во црквата од безбедносни причини.