Италијанскиот парламент донесе законска одлука: Илјадници зависници од дрога ќе бидат ослободени поради пренатрупаност на затворите

Италијанскиот парламент во понеделник донесе закон со кој потенцијално ќе им се овозможи на илјадници затвореници со зависност од дрога или алкохол да ги издржуваат своите казни дома додека учествуваат во програми за рехабилитација, во обид да се намали пренатрупаноста на затворите. Италијанските затвори се исполнети со капацитет од 140 проценти, според групата за права на затворениците „Антигона“. Тоа е една од најлошите стапки на пренатрупаност на затворите во Европската Унија, а Франција има слична стапка.

Министерот за правда Карло Нордио рече дека мерката би можела да се примени на повеќе од 10.000 зависници од дрога, од вкупно околу 65.000 затвореници. Дополнителни 3.700 затвореници со проблеми со алкохолот, исто така, би можеле да имаат корист од мерката, според документот.

Сепак, „Антигона“ е скептична во врска со мерката, предупредувајќи дека ослободувањето ќе зависи од неколку услови и дека средствата предвидени со законот во теорија ќе финансираат рехабилитација на помалку од 600 зависници. Премиерката Џорџија Мелони го нарече законот „победа на повеќе фронтови“ што ќе го намали притисокот врз затворите и ќе помогне да се одвратат зависниците од криминал.

Владата на Џорџа Мелони минатата година вети дека ќе обезбеди дополнителни 15.000 места во затвор, но бројот сè уште не е зголемен. Реформата на затворите е политички чувствително прашање за Мелони со приближувањето на изборите следната година, а крајно десничарската опозициска партија „Футуро Назионале“ (Национална иднина) ја критикува неа и нејзините сојузници.

Тие веруваат дека таа има премногу мек пристап кон криминалот и имиграцијата. Футуро Назионале, основана оваа година од поранешниот армиски генерал Роберто Ваначи, се искачува во анкетите на јавното мислење и им одзема гласови на партиите од владејачката коалиција. Денес, партијата гласаше против законот за затворите, пренесе „Хина“.