Хорор во Штутгарт: Жена избодена, а потоа и запалена во трговски центар – била во врска со напаѓачот

47-годишна жена се здоби со критични повреди откако маж ја избоде повеќе пати, а потоа ја запали во трговскиот центар „Миланео“ во Штутгарт. Полицијата набрзо го уапси осомничениот, 54-годишен германски државјанин, за кого се верува дека бил во врска со жртвата.

Нападот се случи околу 10:15 часот, кога полицијата прими бројни повици од граѓани кои го пријавија бруталниот инцидент во трговскиот центар.

„Околу 10:15 часот добивме голем број повици во врска со напад врз 47-годишна жена во трговски центар во северниот дел на Штутгарт“, изјави портпаролот на полицијата Тимо Бренер, како што пренесува „Билд“.

Тој додаде дека жртвата итно била пренесена во болница, каде што била подложена на итна операција.

„Жената во моментов е на итна операција“, рече Бренер.

Според полицијата, осомничениот бил со жената во трговскиот центар непосредно пред нападот. Потоа, тој ненадејно извадил нож, ја избодел повеќе пати и ја запалил.

По нападот тој побегнал од трговскиот центар, поради што полицијата ги блокирала сите влезови и излези за да го спречи неговото бегство. Во потрагата учествувале бројни полицајци и полициски хеликоптер.

Осомничениот бил уапсен околу 12:10 часот на улицата Бокелштрасе (Bokelstraße), недалеку од местото на нападот.

„Нашите полицајци уапсија 54-годишен германски државјанин во областа на улицата Бокелштрасе околу 12:10 часот. Тој е во врска – или, поточно, бил во врска – со жртвата“, изјави портпаролот на полицијата. Полицијата соопшти дека во моментов нема опасност за јавноста, додека истражителите вршат увид на лице место и ги анализираат снимките од надзорните камери за да ги утврдат сите околности на нападот.

Мотивот за злосторството засега е непознат.

Се очекува осомничениот да биде изведен пред истражен судија во петок, на барање на обвинителството.