Хакери од северна Кореја украдоа 350 милиони долари во криптовалути

Крипто-берзата Bitget, со седиште во Сингапур, објави дека претрпела голем безбедносен напад во кој биле украдени околу 351 милион долари во различни видови дигитални средства. Инцидентот се случил кон крајот на септември и во моментов претставува најголема кражба на криптовалути во 2026 година. Од Bitget се сомневаат дека зад нападот стојат хакери поврзани со Северна Кореја.

По откривањето на неовластените трансакции, Bitget привремено го сопре повлекувањето на средствата. Извршната директорка Грејси Чен соопшти дека средствата на корисниците се безбедни и дека загубата ќе биде покриена од заштитниот фонд на компанијата, кој моментално изнесува повеќе од 464 милиони долари, пренесува Bug.

Според нејзините зборови, напаѓачите не ги компромитирале директно приватните клучеви на корисниците, туку упаднале во клучниот бек-енд систем од инфраструктурата на жешките паричници (hot wallets).

Ова им овозможило да ги менуваат податоците за трансакциите и да иницираат одобрување на масовен трансфер на средства.

Bitget во истрагата соработува со безбедносните компании Mandiant и SlowMist, додека блокчејн-аналитичарите ги следат украдените средства. Напаѓачите наводно поголемиот дел од украдениот имот го замениле за Ether.

Засега не е познато кога на корисниците повторно ќе им биде овозможено повлекување на средствата.

Од Bitget сметаат дека начинот на кој е изведен нападот одговара на шаблоните од претходните напади поврзани со севернокорејски хакерски групи, вклучувајќи ја и групата Lazarus. Украдените средства од крипто-секторот често се доведуваат во врска со финансирањето на севернокорејската програма за вооружување и заобиколувањето на меѓународните санкции.

Според податоците на аналитичарите, Северна Кореја оваа година се поврзува со речиси три четвртини од сите кражби на криптовалути. Хакерските групи користат методи како што се социјален инженеринг и таргетирани напади врз вработените во крипто-компаниите.